Sekretari i Përgjithshëm i NATO-s, Mark Rutte, ka vlerësuar rolin strategjik të Turqisë në Aleancën Atlantike, duke e cilësuar atë një nga aleatët më të rëndësishëm për sigurinë europiane.
Gjatë një prononcimi për mediat në Samitin e Komunitetit Politik Europian, në Dublin, Rutte theksoi se Turqia zotëron një nga ushtritë më të mëdha në Europë dhe një industri të zhvilluar të mbrojtjes.
“Turqia është qartësisht një nga aleatët kyç të NATO-s. Ajo është pjesë e Aleancës pothuajse që prej fillimit. Ka një nga ushtritë më të mëdha në Europë dhe një nga bazat më të mëdha të industrisë së mbrojtjes në kontinent”, deklaroi Rutte, sipas agjencisë Anadolu.
Ai shtoi se Turqia gëzon respekt të madh nga 31 vendet e tjera anëtare të Aleancës.
Turqia pritet të ketë rol në garancitë e sigurisë për Ukrainën
Duke folur për përpjekjet diplomatike për përfundimin e luftës në Ukrainë, kreu i NATO-s deklaroi se Turqia dhe disa vende të rëndësishme europiane parashikohet të përfshihen në mekanizmat e garancive të sigurisë për Kievin.
Rutte kujtoi se gjatë një takimi në Paris, në janar, Shtetet e Bashkuara dhe partnerët europianë kishin arritur në përfundime të përbashkëta mbi organizimin e këtyre garancive, duke përfshirë edhe mbështetjen amerikane.
“E gjithë kjo është në thelb e përfunduar dhe gati. Por tani, natyrisht, na nevojitet një marrëveshje paqeje ose të paktën një armëpushim. Për këtë po punojnë intensivisht të gjithë”, u shpreh ai.
Sipas Rutte, zbatimi i mekanizmave të sigurisë mbetet i kushtëzuar nga arritja e një marrëveshjeje mes Ukrainës dhe Rusisë.
NATO rrit shpenzimet për mbrojtjen
Sekretari i Përgjithshëm paralajmëroi se Europa vazhdon të përballet me kërcënime të rëndësishme të sigurisë, duke përmendur Rusinë dhe bashkëpunimin e saj me Iranin, Kinën dhe Korenë e Veriut.
Ai bëri të ditur se vendet europiane anëtare të NATO-s dhe Kanadaja kanë rritur shpenzimet për mbrojtjen me 250 miliardë dollarë shtesë gjatë viteve 2025 dhe 2026.
Megjithatë, sipas tij, investimet duhet të vijojnë, veçanërisht për zgjerimin e kapaciteteve të prodhimit të industrisë ushtarake.
Rutte kërkoi gjithashtu vazhdimin e furnizimeve me pajisje ushtarake për Ukrainën, me qëllim forcimin e aftësive të saj mbrojtëse dhe të pozicionit negociues përballë Moskës.
Ai konfirmoi se dërgesat e pajisjeve amerikane përmes programit PURL po vijojnë, përfshirë sistemet e mbrojtjes ajrore Patriot.
Paralajmërim për sulmet kibernetike dhe sabotimet
Kreu i NATO-s u ndal edhe te rreziku në rritje i kërcënimeve hibride në Europë, përfshirë sulmet kibernetike dhe aktet e sabotimit.
Sipas tij, përballimi i këtyre kërcënimeve kërkon bashkëpunim më të ngushtë mes qeverive, industrisë dhe shoqërisë.
Rutte theksoi se forcimi i mbrojtjes kolektive dhe mbështetja për Ukrainën mbeten ndër përparësitë kryesore të Aleancës Atlantike.
