Sekretari i Përgjithshëm i NATO-s, Mark Rutte, i ka dhënë mbështetje të fortë presidentit amerikan Donald Trump, duke deklaruar se ai kishte të drejtë kur u kërkoi aleatëve të rrisnin shpenzimet për mbrojtjen dhe të modernizonin ushtritë e tyre.

Në një intervistë për POLITICO gjatë samitit të NATO-s në Ankara, Rutte tha se Trump po arrin një objektiv që presidentët amerikanë kanë ndjekur prej dekadash: një ndarje më të barabartë të barrës financiare mes SHBA-së dhe Evropës.

“Më pëlqen ai si njeri. Mendoj se ajo që po bën për NATO-n është një lajm shumë i mirë”, tha Rutte.

Sipas tij, samiti i këtij viti do të jetë “transformues” për aleancën, ndërsa vendet anëtare po angazhojnë miliarda euro të tjera për mbrojtjen. Vetëm gjatë dy viteve të fundit, 31 vendet anëtare të NATO-s, pa përfshirë SHBA-në, kanë premtuar rreth 250 miliardë dollarë investime të reja në mbrojtje.

Rutte theksoi se Evropa dhe Kanadaja po marrin një rol më të madh në mbrojtjen e kontinentit, duke e bërë NATO-n më të qëndrueshme dhe më pak të varur nga Shtetet e Bashkuara.

Ai nënvizoi se shtysa për rritjen e shpenzimeve nuk vjen vetëm nga presioni i Trump, por edhe nga kërcënimi që paraqet Rusia.

“Duhet ta bëjmë këtë për shkak të kërcënimit rus. Shohim çdo ditë se çfarë po bën Rusia në Ukrainë”, tha Rutte, duke shtuar se NATO duhet të mbrojë rreth një miliard qytetarë nga kërcënimet që vijnë nga Rusia, Kina, Koreja e Veriut dhe Irani.

Duke komentuar operacionin ushtarak amerikan kundër Iranit, Rutte tha se Evropa ka luajtur një rol kyç në mbështetjen logjistike të SHBA-së.

“SHBA-ja ndoshta nuk do ta kishte realizuar operacionin ‘Epic Fury’ pa përdorur Evropën si platformë strategjike”, u shpreh ai, duke përmendur se Rumania mbylli aeroportin e saj më të madh civil për të lehtësuar operacionet ajrore amerikane dhe se mijëra fluturime ushtarake janë kryer nga bazat evropiane.

Megjithëse pranoi se Trump ka shprehur zhgënjim ndaj disa aleatëve, Rutte theksoi se, në tërësi, vendet evropiane kanë dhënë një kontribut të rëndësishëm dhe se NATO mbetet e bashkuar me SHBA-në si partneri i saj kryesor.