Franca dhe Siria nënshkruan këtë të diel në Damask disa marrëveshje bashkëpunimi, mes të cilave edhe një shkresë për kthimin e 51 milionë eurove të konfiskuara nga asetet e Rifat al-Assad, xhaxhait të ish-presidentit sirian Bashar al-Assad.

Në një konferencë të përbashkët me presidentin sirian Ahmed al-Sharaa, presidenti francez Emmanuel Macron deklaroi se fondet e sekuestruara në Francë do t’i rikthehen popullit sirian dhe do të përdoren për financimin e projekteve të zhvillimit.

“Më shumë se 50 milionë euro nga prona e konfiskuar e fituar në mënyrë të paligjshme nga familja e ish-diktatorit do t’i kthehen popullit sirian për të financuar projekte specifike zhvillimi në vend”, tha Macron.

Shkresa u nënshkrua nga ministrat e Jashtëm të Francës dhe Sirisë dhe përcakton se shuma e transferuar është 51 milionë euro.

Rifat al-Assad, i cili ndërroi jetë në mërgim në fillim të vitit 2026 në moshën 88-vjeçare, njihej si “Kasapi i Hamës” për rolin e tij në shtypjen e kryengritjes së Vëllazërisë Myslimane në qytetin Hama në vitin 1982.

Pas një tentative të dështuar për grusht shteti në vitin 1984, ai u largua nga Siria dhe jetoi për dekada në Zvicër e më pas në Francë. Në vitin 2021 u rikthye në Siri për t’iu shmangur ekzekutimit të një dënimi me katër vite burg të dhënë nga drejtësia franceze, pasi ishte shpallur fajtor për pastrim parash dhe përvetësim të fondeve shtetërore siriane.