Sekretari amerikan i Shtetit, Marco Rubio, deklaroi se Uashingtoni është i gatshëm të zhvillojë bisedime me përfaqësuesit e Iranit në margjinat e Asamblesë së Përgjithshme të Kombeve të Bashkuara në Nju Jork.
Megjithatë, kreu i diplomacisë amerikane bëri të ditur se deri tani nuk është planifikuar asnjë takim ndërmjet palëve.
“Jemi të hapur për këtë. Nuk mendoj se ka ndonjë gjë të planifikuar në këtë pikë, por sigurisht që jemi të hapur për diçka të tillë, veçanërisht nëse ekziston mundësia që të sjellë rezultate pozitive”, tha Rubio në një intervistë për emisionin “Today” të NBC-së.
Sipas tij, qëllimi kryesor i administratës amerikane mbetet parandalimi i pajisjes së Iranit me armë bërthamore.
“Qëllimi është që Irani të mos mund të pajiset kurrë me armë bërthamore. Thjesht nuk mundet”, theksoi sekretari amerikan i Shtetit.
Deklarata e Rubios vjen pas raportimeve se Teherani ka propozuar rihapjen e Ngushticës së Hormuzit brenda shtatë ditësh, nëse Shtetet e Bashkuara ndërmarrin hapa fillestarë për të reduktuar presionin ushtarak.
Sipas një zyrtari të lartë iranian, propozimi i është përcjellë tashmë Uashingtonit nëpërmjet ndërmjetësve dhe parashikon nisjen e bisedimeve të reja për t’i dhënë fund armiqësive mes dy vendeve.
Irani pritet ta shfrytëzojë javën e Asamblesë së Përgjithshme të OKB-së për të zhvilluar konsultime me vendet që po veprojnë si ndërmjetëse mes Teheranit dhe Uashingtonit.
Megjithëse palët kanë sinjalizuar gatishmëri për dialog, ende nuk është bërë e ditur nëse kontaktet diplomatike do të çojnë në një takim të drejtpërdrejtë gjatë qëndrimit të delegacioneve në Nju Jork.
