Ambasadorja e Bashkimit Evropian në Shqipëri, Sofia Moreira de Sousa, ka theksuar rëndësinë e përfshirjes së shoqërisë civile në procesin e integrimit evropian, duke kërkuar konsultime publike më kuptimplota dhe masa konkrete për adresimin e problematikave të ngritura.
Gjatë prezantimit të Raportit të Komisionit Evropian për Shqipërinë për vitin 2026 përpara organizatave të shoqërisë civile, ambasadorja nënvizoi se shumë prej shqetësimeve të tyre janë pasqyruar në dokumentin që vlerëson përparimin e vendit drejt anëtarësimit në BE.
Diskutimet u përqendruan te çështje të rëndësishme si mbrojtja e mjedisit, transparenca, të drejtat e pronësisë mbi tokën, arsimi dhe shëndetësia, si dhe mënyra e matjes së progresit në këto fusha.
“Shoqëria civile është një partner kyç në procesin e anëtarësimit të Shqipërisë në BE dhe shumë prej shqetësimeve të saj janë pasqyruar në raportin për Shqipërinë 2026”, u shpreh Moreira de Sousa në një postim në rrjetet sociale.
“Ligjet e mira duhet të mbështeten me buxhetet e nevojshme”
Ambasadorja theksoi se miratimi i legjislacionit nuk është i mjaftueshëm nëse nuk shoqërohet me burimet financiare dhe masat e nevojshme për zbatimin e tij.
“Raporti është i qartë. Shqipëria ka nevojë për konsultime publike kuptimplota, të shoqëruara me masa konkrete për adresimin e çështjeve të ngritura. Gjithashtu, ligjet e mira duhet të mbështeten me buxhetet e nevojshme për zbatimin e tyre, përfshirë politikat sociale”, deklaroi ajo.
Moreira de Sousa nënvizoi se procesi i anëtarësimit në Bashkimin Evropian prek të gjitha fushat e shoqërisë dhe se për të siguruar rezultate të qëndrueshme, ai duhet të jetë gjithëpërfshirës.
“Procesi i anëtarësimit prek çdo pjesë të shoqërisë. Që rezultatet e tij të jenë të qëndrueshme, ky proces duhet të jetë gjithëpërfshirës”, theksoi ambasadorja.
Në përfundim, ajo garantoi se Delegacioni i Bashkimit Evropian do të vijojë të ndjekë nga afër çështjet e ngritura nga organizatat e shoqërisë civile.
Mesazhi i ambasadores vë theksin te nevoja që reformat e ndërmarra në kuadër të integrimit evropian të shoqërohen me zbatim konkret, transparencë dhe pjesëmarrje më të gjerë të qytetarëve në vendimmarrje.
