Rama reagon ndaj “Reporterëve pa Kufij” për raportin mbi lirinë e medias
Kryeministri Edi Rama ka reaguar sot në rrjetet sociale pas deklaratës së organizatës “Reporterët pa Kufij”, lidhur me raportin e fundit për lirinë e medias në Shqipëri në vitin 2026.
Organizata ndërkombëtare theksoi se mat lirinë e medias dhe jo komunikimin e qeverisë, duke iu përgjigjur komenteve të mëparshme të kryeministrit.
Në reagimin e tij, Rama sqaroi se nuk ka pretenduar kurrë që “Reporterët pa Kufij” vlerësojnë mënyrën e komunikimit të ekzekutivit, por shtoi se vlerësimet ndërkombëtare duhen parë në një kontekst më të gjerë.
“Por tani që e përmendët, thjesht po mendoj: a nuk është ndoshta një ide e mirë që ju të lexoni raportet e atyre që realisht e bëjnë këtë, dhe e bëjnë në mënyrë profesionale dhe objektive?”, u shpreh Rama në reagimin e tij.
Kryeministri iu referua edhe raportit të SIGMA-s, duke theksuar se ai evidenton përmirësime në strukturimin e komunikimit institucional në Shqipëri, përfshirë krijimin e Agjencisë për Media dhe Informim (MIA), e cila sipas tij ka një rol të qartë në koordinimin e komunikimit të administratës shtetërore.
Sipas Ramës, kjo strukturë është pjesë e përpjekjeve për të përmirësuar transparencën dhe informimin publik, ndërsa ai shtoi se vlerësimet e ndryshme ndërkombëtare shpesh paraqesin këndvështrime të ndryshme mbi të njëjtat procese.
“Mund t’ju ndihmojë, sepse dalin në pah kundërshti të rëndësishme midis vlerësimeve tuaja dhe të tyre kur bëhet fjalë për marrëdhënien midis qeverisë, medias dhe publikut në një vend të lirë si Shqipëria”, u shpreh Rama, duke mbyllur reagimin e tij.
Debati vjen në një moment kur raportet ndërkombëtare mbi lirinë e medias në vend kanë tërhequr vëmendje të shtuar dhe janë bërë pjesë e diskutimeve politike dhe institucionale në nivel kombëtar dhe ndërkombëtar.
