Kryeministri Edi Rama ka përgëzuar Kombëtaren shqiptare të vajzave pas fitores historike 5-2 ndaj Malit të Zi në stadiumin “Loro Boriçi”, sukses që i siguroi Shqipërisë kualifikimin në raundin e parë të play-off-it për Botërorin “Brazil 2027”.

Përmes një reagimi publik, Rama vlerësoi arritjen e skuadrës kuqezi, duke theksuar se vetëm pas 16 vitesh rrugëtim, futbolli i femrave në Shqipëri ka shkruar një faqe historike.

Skuadra e drejtuar nga trajneri Armir Grima zhvilloi një paraqitje mbresëlënëse ndaj Malit të Zi, duke përmbysur dy herë rezultatin dhe duke dominuar takimin përpara tifozëve shqiptarë.

Ndeshja nisi me raste të shumta për Shqipërinë, ndërsa Fortesa Berisha goditi traversën që në minutën e katërt. Megjithatë, ishin malazezet që kaluan të parat në avantazh në minutën e 20-të.

Pavarësisht golit të dytë të miqve në fundin e pjesës së parë, Shqipëria reagoi menjëherë me Fortesa Berishën, e cila shënoi për 2-2 pas një aksioni të ndërtuar nga Megi Doçi dhe Klea Hamonikaj.

Në pjesën e dytë, kuqezinjtë morën kontrollin e plotë të lojës, ndërsa Arbiona Bajraktari vulosi fitoren me golin e pestë në minutën e 70-të, duke mbyllur sfidën me rezultatin e thellë 5-2.

Falë këtij suksesi, Kombëtarja e vajzave siguroi kualifikimin në play-off-in e Botërorit “Brazil 2027”, konfirmoi qëndrimin në Ligën B dhe vendosi një rekord të ri, duke grumbulluar për herë të parë 7 pikë në një grup të këtij niveli.