Rama në Manastir, zbulohet pllaka përkujtimore për 100-vjetorin e Konventës Konsullore të vitit 1926

22 Nov 2026 • 17:35
Shpërndaje:

Kryeministri Edi Rama, në vijim të vizitës së tij zyrtare në Maqedoninë e Veriut, është ndalur në Konsullatën e Nderit të Republikës së Shqipërisë në Manastir, ku u zhvillua një ceremoni përkujtimore me rastin e 100-vjetorit të Konventës Konsullore të vitit 1926.

Në kuadër të kësaj ngjarjeje u zbulua një pllakë përkujtimore, e cila simbolizon trashëgiminë historike dhe diplomatike shqiptare në Manastir, një qytet me rëndësi të veçantë për historinë e gjuhës shqipe dhe Rilindjen Kombëtare.

Në ceremoni përshëndeti Konsulli i Nderit i Republikës së Shqipërisë në Manastir, Imer Selmani, i cili falënderoi kryeministrin Rama për praninë e tij dhe vlerësoi rëndësinë e kësaj vizite për ruajtjen e lidhjeve historike dhe kulturore mes shqiptarëve në të dyja anët e kufirit.

Reklamë Ola

Selmani e cilësoi Manastirin si një nga qendrat më të rëndësishme të historisë kombëtare shqiptare, duke kujtuar rolin e qytetit në zhvillimin e arsimit, gjuhës dhe diplomacisë shqiptare.

“Është një privilegj i veçantë që sot të shpalosim pllakën përkujtimore me rastin e 100-vjetorit të Konventës Konsullore të vitit 1926 dhe të rikujtojmë se Manastiri zë një vend të veçantë në historinë tonë kombëtare, si qyteti i alfabetit shqip, i Rilindjes, i dijes dhe i diplomacisë”, deklaroi Selmani.

Reklamë InterMedika

Ai theksoi se kontributi i Manastirit dhe i komunitetit shqiptar të këtij qyteti ka qenë i rëndësishëm në formësimin dhe ruajtjen e identitetit kombëtar.

“Me të gjitha këto atribute, Manastiri dhe shqiptarët e tij kanë kontribuar në formësimin e identitetit tonë kombëtar”, u shpreh Konsulli i Nderit.

Manastiri zë një vend të veçantë në historinë shqiptare për shkak të Kongresit të Alfabetit, i zhvilluar nga 14 deri më 22 nëntor 1908, gjatë të cilit u hodhën themelet e alfabetit të përbashkët të gjuhës shqipe.

Kjo ngjarje përbën një nga momentet më të rëndësishme të Rilindjes Kombëtare, pasi krijoi kushtet për zhvillimin e mëtejshëm të arsimit dhe letërsisë shqipe, si dhe për forcimin e identitetit kulturor të shqiptarëve.

Ceremonia përkujtimore u zhvillua në një periudhë simbolike, në përvjetorin e Kongresit të Manastirit dhe në kuadër të aktiviteteve kushtuar Ditës së Alfabetit të Gjuhës Shqipe.

Gjatë fjalës së tij, Selmani vlerësoi gjithashtu praninë e kryeministrit Rama si një dëshmi të respektit të institucioneve shqiptare ndaj trashëgimisë historike dhe diplomatike të Manastirit.

Ai theksoi se ruajtja e kësaj trashëgimie duhet të shërbejë si një nxitje për forcimin e mëtejshëm të marrëdhënieve mes Shqipërisë dhe Maqedonisë së Veriut.

“Si Konsull Nderi, e konsideroj këtë trashëgimi një përgjegjësi dhe një frymëzim për të vazhduar ndërtimin e urave të bashkëpunimit dhe të miqësisë mes Shqipërisë dhe Maqedonisë së Veriut”, deklaroi Selmani.

Sipas tij, përkujtimi i ngjarjeve të rëndësishme historike nuk duhet të mbetet vetëm një akt simbolik, por të shërbejë edhe për përcjelljen e vlerave kombëtare dhe kulturore te brezat e rinj.

“Le të mbetet kjo pllakë një dëshmi e përhershme e historisë sonë dhe një mesazh për brezat që vijnë: të ruajmë, të nderojmë dhe të përcjellim me krenari trashëgiminë tonë”, përfundoi ai.

Vizita e kryeministrit Rama në Manastir dhe zbulimi i pllakës përkujtimore shënojnë një moment simbolik në vlerësimin e historisë së diplomacisë shqiptare dhe të rolit të këtij qyteti në zhvillimet kombëtare.

Ceremonia përcolli gjithashtu mesazhin e rëndësisë së ruajtjes së trashëgimisë historike dhe forcimit të marrëdhënieve të bashkëpunimit e miqësisë mes Shqipërisë dhe Maqedonisë së Veriut.