Rama kujton 26 majin 1996: “Dy botë të ndryshme” dhe rrugëtimi i Shqipërisë ndër vite

Kryeministri ka publikuar një video në rrjetet sociale në përkujtim të 26 majit 1996, një nga datat më të debatueshme të historisë politike të vendit pas rënies së komunizmit.

Në videon e shpërndarë, Rama sjell pamje që krahasojnë Shqipërinë e asaj periudhe me realitetin e sotëm, duke vënë në dukje transformimet dhe zhvillimet që ka kaluar vendi gjatë afro tre dekadave.

“Shqipëria e 1996, dhe ku është Shqipëria sot! Dhe me një datë që flet për dy botë, ju uroj një ditë të mbarë!”, shkruan Rama krahas videos.

26 maji i vitit 1996 lidhet me zgjedhjet parlamentare të asaj kohe, të cilat u shoqëruan me tensione të forta politike, akuza për manipulim dhe protesta nga opozita, duke u konsideruar një moment kyç në tranzicionin demokratik të Shqipërisë.

Përmes kësaj videoje, kreu i qeverisë rikthen në vëmendje kontrastin mes Shqipërisë së viteve ’90 dhe zhvillimeve të mëvonshme, duke theksuar rrugëtimin e vendit drejt konsolidimit demokratik dhe integrimit europian.