Kryebashkiaku i Nju Jorkut, Zohran Mamdani, i është përgjigjur ashpër kryeministrit izraelit Benjamin Netanyahu, pasi ky i fundit e sulmoi drejtpërdrejt gjatë fjalimit në Asamblenë e Përgjithshme të OKB-së.
Netanyahu e akuzoi Mamdanin për antisemitizëm dhe pretendoi se shumë hebrenj nuk ndihen më të sigurt në Nju Jork. Kryeministri izraelit kundërshtoi gjithashtu akuzat për gjenocid në Gaza dhe iu drejtua drejtpërdrejt kryebashkiakut.
“Ju u përpoqët të më ndalonit të vija këtu, u përpoqët të më heshtnit. Nuk mund të më heshtni”, deklaroi Netanyahu nga foltorja e OKB-së.
Pak orë më vonë erdhi reagimi i Mamdanit.
“Siç ka bërë vazhdimisht, kryeministri Netanyahu e përdori fjalimin e tij për të përsëritur gënjeshtra të pabaza që synojnë të pastrojnë imazhin e asaj që unë e konsideroj gjenocid ndaj palestinezëve”, deklaroi kryebashkiaku.
Mamdani iu referua më pas urdhër-arrestit të Gjykatës Penale Ndërkombëtare ndaj kryeministrit izraelit.
“Asnjë gënjeshtër nuk mund të ndryshojë faktin se ai mbetet subjekt i një urdhër-arresti të Gjykatës Penale Ndërkombëtare, me akuza për krime lufte dhe krime kundër njerëzimit”, tha ai.
Gjykata Penale Ndërkombëtare lëshoi në nëntor të vitit 2024 urdhër-arreste ndaj Netanyahut dhe ish-ministrit izraelit të Mbrojtjes, Yoav Gallant, për krime të dyshuara lufte dhe krime kundër njerëzimit lidhur me luftën në Gaza. Netanyahu dhe Izraeli i kanë kundërshtuar akuzat dhe juridiksionin e gjykatës.
Shtetet e Bashkuara nuk janë palë e Statutit të Romës, traktatit themelues të ICC-së, dhe administrata amerikane ka kundërshtuar urdhër-arrestin ndaj kryeministrit izraelit.
Përplasja mes Netanyahut dhe Mamdanit është intensifikuar gjatë ditëve të fundit. Kryebashkiaku i Nju Jorkut ka kërkuar publikisht respektimin e urdhër-arrestit të ICC-së, ndonëse ka pranuar se autoritetet bashkiake nuk kanë kompetencën ligjore për ta ekzekutuar atë.
Netanyahu, nga ana tjetër, përdori një pjesë të fjalimit të tij në OKB për të sulmuar drejtpërdrejt Mamdanin dhe për të hedhur poshtë akuzat ndaj Izraelit për mënyrën se si ka zhvilluar luftën në Gaza.
