Përplasje e fortë mes Donald Trump dhe Friedrich Merz: SHBA paralajmëron tërheqje trupash nga Gjermania
Përplasja mes Donald Trump dhe kancelarit gjerman Friedrich Merz po ashpërsohet, teksa Uashingtoni paralajmëron një vendim të afërt për reduktimin e trupave amerikane në Gjermania.
Në një postim në platformën Truth Social, Trump bëri të ditur se SHBA po shqyrton këtë hap dhe se një vendim mund të merret “së shpejti”. Deklarata vjen pas kritikave të forta ndaj Merz, i cili kishte shprehur rezerva për ofensivën amerikane ndaj Iranit.
“Ky nuk ka asnjë ide për çfarë po flet!”, shkroi Trump, duke shtuar se “nuk është çudi që Gjermania po ecën keq ekonomikisht dhe në aspekte të tjera”. Ai akuzoi gjithashtu kancelarin se po toleron mundësinë që Irani të zotërojë armë bërthamore, një pretendim që nuk është konfirmuar nga deklaratat publike të Merz.
Sipas të dhënave të ushtrisë amerikane, rreth 86 mijë trupa janë aktualisht të dislokuara në Evropë, prej të cilave afro 39 mijë ndodhen në Gjermani. Ky numër ndryshon në mënyrë të vazhdueshme për shkak të rotacioneve dhe stërvitjeve ushtarake.
Nga ana tjetër, Merz ka tentuar të qetësojë situatën, duke deklaruar se marrëdhënia e tij personale me Trump “mbetet e mirë dhe e pandryshuar” dhe se komunikimi mes tyre vazhdon normalisht.
Megjithatë, tensionet janë rritur pas kritikave të kancelarit gjerman ndaj strategjisë amerikane në konfliktin me Iranin, duke e cilësuar atë si të paqartë dhe pa një plan daljeje.
Kjo nuk është hera e parë që Trump kërcënon me tërheqje trupash nga Gjermania. Gjatë mandatit të tij të parë, ai kishte paralajmëruar tërheqjen e mijëra ushtarëve, një plan që u ndal më pas nga pasardhësi i tij, Joe Biden.
Zhvillimet e fundit sinjalizojnë një përkeqësim të marrëdhënieve transatlantike në një moment të ndjeshëm për sigurinë globale.
