Komisionerja evropiane për Zgjerimin, Marta Kos, ka shprehur optimizëm për përparimin e Moldavisë drejt anëtarësimit në Bashkimin Evropian, duke e pozicionuar vendin në një rrugë të ngjashme me Shqipërinë dhe Malin e Zi, dy prej vendeve më të avancuara në procesin e integrimit.
Gjatë një vizite në Kishinau, Kos theksoi se vazhdimësia e reformave, pavarësia e gjyqësorit, lufta kundër korrupsionit dhe forcimi i institucioneve demokratike mbeten kushtet vendimtare për anëtarësimin në BE.
Sipas saj, nëse Moldavia ruan ritmin aktual të reformave, mund të mbyllë deri në 25 kapituj negociatash brenda vitit 2027, duke iu afruar nivelit ku ndodhet aktualisht Mali i Zi.
“Shtetet anëtare tashmë po përgatisin traktatin e anëtarësimit për Malin e Zi. Nëse arrini rezultate të mira, edhe ju do të jeni në këtë pozitë”, deklaroi Kos.
Komisionerja shtoi se ruajtja e ritmit të reformave mund ta vendosë Moldavinë në një rrugë të besueshme drejt përfundimit të negociatave në fillim të vitit 2028.
Sandu: Anëtarësimi në BE, objektiv ambicioz por realist
Presidentja e Moldavisë, Maia Sandu, rikonfirmoi synimin e vendit për të përfunduar negociatat e anëtarësimit deri në fund të vitit 2028.
Ajo pranoi se jo të gjitha vendimet për zgjerimin varen nga autoritetet moldave, por theksoi se vendi duhet të vijojë ndërtimin e institucioneve demokratike dhe forcimin e sundimit të ligjit.
“Ne duam një vend ku respektohet sundimi i ligjit, ku njerëzit mund të jetojnë dhe të punojnë të sigurt”, deklaroi Sandu.
Ndërkohë, zëvendësministrja qipriote për Çështjet Evropiane, Marilena Raouna, theksoi se procesi i zgjerimit kërkon reforma konkrete dhe konsensus mes vendeve anëtare.
Sipas saj, zgjerimi i Bashkimit Evropian është kthyer në një domosdoshmëri gjeopolitike dhe përbën një investim në sigurinë dhe prosperitetin e vetë unionit.
Moldavia forcon lidhjet energjetike me Evropën
Deklaratat për perspektivën evropiane të Moldavisë përkojnë me vënien zyrtarisht në funksion të një linje të re energjetike që lidh vendin me Rumaninë dhe rrjetin evropian.
Ky investim synon të forcojë sigurinë energjetike të Moldavisë dhe të reduktojë varësinë e saj nga energjia ruse.
Zhvillimet vijnë në një periudhë kur Bashkimi Evropian po i kushton rëndësi të veçantë zgjerimit, ndërsa vendet kandidate synojnë përshpejtimin e reformave dhe përparimin drejt anëtarësimit.
