Mladenov: Rindërtimi i Gazës nis vetëm pas çarmatimit të Hamasit

Nikolay Mladenov deklaroi sot se rindërtimi i Rripit të Gazës, i cili u shkatërrua në masë të madhe gjatë luftës së fundit, do të fillojë vetëm pasi Hamas të çarmatoset.

“Në zonat e Rripit të Gazës ku ende mban pushtetin, Hamasi po konsolidon kontrollin e tij mbi popullsinë”, tha zyrtari i lartë ndërkombëtar.

Diplomati bullgar dhe i dërguari i OKB-së për Lindjen e Mesme vepron si ndërlidhës midis Këshillit të Paqes dhe administratës së përkohshme palestineze të Rripit të Gazës. Ai gjithashtu është konsultuar me kryeministrin izraelit Benjamin Netanyahu në Jeruzalem.

“Hamasi po vendos taksa ndaj njerëzve që nuk kanë më asgjë për të dhënë dhe po pengon punonjësit palestinezë të kualifikuar, të ndërtojnë strehim më të mirë për personat e zhvendosur brenda vendit”, tha ai.

Ai bëri thirrje që Hamasi të heqë dorë nga udhëheqja në Rripin e Gazës, duke shtuar se ata që respektojnë ligjin mund të kenë rol në “Gazan e re”, ndërsa të tjerëve u mundësohet largimi i sigurt.

“Për palestinezët në brezin bregdetar, lufta nuk ka përfunduar ende plotësisht”, tha Mladenov.

Sipas tij, një plan me 15 pika i hartuar nga SHBA, Egjipti, Katari dhe Turqia synon të zbatojë një proces paqeje, por Hamasi deri tani ka refuzuar çarmatimin. Ushtria e Izraelit vazhdon të kontrollojë rreth gjysmës së territorit të Gazës.