Liderët kryesorë europianë që morën pjesë në Samitin e NATO-s në Ankara u larguan me një dhuratë të pazakontë nga presidenti turk Recep Tayyip Erdoğan: pistoleta ceremoniale të gdhendura, të shoqëruara me municion të vërtetë dhe komplet pastrimi.

Sipas POLITICO, dhuratat iu dorëzuan të mërkurën presidentes së Komisionit Europian, Ursula von der Leyen, dhe presidentit të Këshillit Europian, António Costa. Lajmi është konfirmuar nga dy zyrtarë të Bashkimit Europian.

Një zyrtar i Këshillit Europian bëri të ditur se arma e marrë nga Costa iu dorëzua menjëherë ekipit të sigurisë për verifikime.

“Do të ndjekim procedurat belge për transportimin e saj në Belgjikë dhe më pas do të ruhet sipas kërkesave të sigurisë të Sekretariatit të Përgjithshëm të Këshillit”, tha zyrtari.

Ndërkohë, një zëdhënës i Ursula von der Leyen deklaroi se presidentja e Komisionit falënderoi Erdoğanin për gjestin, por arma nuk do të mbetet në përdorim personal.

“Ajo do të transportohet dhe ruhet në mënyrë të sigurt. Pasi të çaktivizohet, synimi është që pistoleta t’i dhurohet një muzeu ushtarak”, tha zëdhënësi.

Megjithatë, sipas burimeve europiane, pistoletat ceremoniale me vlerë të lartë mund të bien ndesh me rregullat e BE-së për kufijtë e lejuar të dhuratave, ndaj nuk pritet të mbahen si pronë personale nga zyrtarët që i morën.

Edhe liderë të tjerë europianë, përfshirë kryeministrin britanik në largim Keir Starmer dhe kryeministrin holandez Rob Jetten, kanë bërë të ditur publikisht se do t’i lënë armët në Turqi për t’u çaktivizuar përpara se të transportohen në vendet e tyre.