Shtetet e Bashkuara do të presin nga e hëna një seri takimesh të G20-s kushtuar “bollëkut të energjisë”, ndërsa lufta e administratës së Presidentit Donald Trump kundër Iranit vazhdon të shkaktojë pasiguri dhe rritje çmimesh në tregjet globale të karburanteve.
Bisedimet do të zhvillohen deri të mërkurën në Houston të Teksasit, një prej qendrave më të rëndësishme të industrisë amerikane të naftës dhe gazit.
Në takime pritet të marrin pjesë delegacione nga ekonomitë kryesore të botës, përfshirë Kinën, Indinë, Japoninë dhe Gjermaninë. Të pranishëm do të jenë edhe përfaqësues nga vende të mëdha prodhuese të energjisë, si Kanadaja dhe Arabia Saudite.
Diplomatët rusë njoftuan të shtunën se Moska do të dërgojë gjithashtu disa zyrtarë në Houston.
Pjesëmarrja e Rusisë pritet të rikthejë debatet e shfaqura në takimin e mëparshëm të G20-s, të zhvilluar dy javë më parë. Prania e papritur e ministrit rus të Financave, Anton Siluanov, shkaktoi reagime nga aleatët evropianë të Ukrainës.
Vendet evropiane shprehën pakënaqësi ndaj vendimit të Uashingtonit për të ftuar përfaqësuesit rusë, duke argumentuar se ky veprim bie ndesh me përpjekjet ndërkombëtare për ta izoluar Moskën për shkak të luftës në Ukrainë.
Takimet zhvillohen në një moment veçanërisht të vështirë për tregjet energjetike. Çmimet e naftës dhe gazit janë rritur ndjeshëm për shkak të konfliktit në Lindjen e Mesme, ndërsa vendet evropiane përpiqen të mbushin rezervat e gazit përpara dimrit.
Një nga përparësitë e shpallura nga Shtetet e Bashkuara, si vendi mikpritës i G20-s, është zgjerimi i aksesit në energji të përballueshme, të besueshme dhe të sigurt.
Megjithatë, furnizimet ndërkombëtare janë goditur që nga nisja e sulmeve amerikane dhe izraelite kundër Iranit në shkurt, duke shtuar presionin mbi konsumatorët dhe bizneset.
Rritja e çmimeve është ndier ndjeshëm edhe në Shtetet e Bashkuara. Sipas Shoqatës Amerikane të Automobilizmit, çmimi mesatar i një galoni naftë dizel ka arritur nivelin rekord prej 6.20 dollarësh.
Edhe benzina e zakonshme kushton rreth 44 për qind më shumë krahasuar me periudhën përpara fillimit të luftës.
Pasojat ekonomike dhe pakënaqësia ndaj konfliktit kanë shtuar shqetësimet brenda Partisë Republikane. Bashkëpunëtorët e Trumpit druhen se rritja e kostos së jetesës dhe çmimeve të karburanteve mund ta dëmtojë partinë në zgjedhjet e mesmandatit të nëntorit.
Në këtë klimë, takimet e G20-s në Houston pritet të përqendrohen te siguria e furnizimeve, stabilizimi i tregjeve dhe mënyrat për ta bërë energjinë më të përballueshme, ndërsa lufta vazhdon t’i vështirësojë këto objektiva.
