Britania e Madhe shpreson të arrijë një marrëveshje me Bashkimin Evropian për të mbrojtur kompanitë britanike nga kufizimet e reja tregtare që pritet të vendosen përmes politikës “Made in Europe”.
Ministri britanik për Marrëdhëniet Evropiane, Hamish Falconer, tha për POLITICO se arritja e një kompromisi është në interesin e të dyja palëve, ndërsa Brukseli po përgatit rregulla që synojnë t’u japin përparësi prodhuesve të BE-së ndaj kompanive nga vendet jashtë bllokut.
“Që Evropa të jetë më konkurruese dhe në gjendje të përballojë disa prej goditjeve për të cilat po flasim, duhet ta bëjmë këtë së bashku”, deklaroi Falconer. Ai tha se argumentet në favor të një marrëveshjeje janë aq të forta sa pret që Londra dhe Brukseli të gjejnë “një zgjidhje të arsyeshme”.
Shqetësimi i Londrës lidhet me mundësinë që kompanitë britanike të përjashtohen nga disa tregje apo programe për shkak të rregullave të reja që favorizojnë produktet me origjinë nga Bashkimi Evropian.
Qeveria britanike ka kërkuar garanci që prodhuesit e saj të mos preken, por Brukseli argumenton se nuk mund t’i japë ato në këtë fazë, pasi legjislacioni i ri është ende në proces diskutimi.
Nëse nuk arrihet një marrëveshje, Londra beson se Marrëveshja e Tregtisë dhe Bashkëpunimit BE-Britani, e nënshkruar pas Brexit-it, mund t’i ofrojë bazë ligjore për të kundërshtuar disa prej kufizimeve.
“Marrëdhëniet tona tregtare mbështeten në TCA. Është një marrëveshje e fortë mes nesh, e cila mbikëqyret në mënyrë të pavarur”, tha Falconer.
Ai shtoi se konkurrueshmëria evropiane nuk përmirësohet duke vendosur pengesa të tjera ndaj bazës industriale britanike.
Sipas POLITICO, shqetësime për përputhshmërinë e rregullave të reja me marrëveshjet ndërkombëtare tregtare të BE-së janë ngritur edhe brenda Brukselit. Juristët e Këshillit të BE-së kanë paralajmëruar se disa dispozita të propozuara në Aktin për Përshpejtimin Industrial mund të bien ndesh me angazhimet tregtare ndërkombëtare të Unionit.
Londra kërkon një zgjidhje relativisht të thjeshtë, sipas së cilës mallrat britanike do të trajtoheshin si produkte me origjinë nga BE-ja për qëllimet e këtij legjislacioni.
Çështja pritet të jetë pjesë e diskutimeve në prag të samitit të ardhshëm Britani-BE, ku palët synojnë të avancojnë gjithashtu negociatat për tregtinë agro-ushqimore, lëvizjen e të rinjve dhe lidhjen e sistemeve të tregtimit të emetimeve.
Falconer konfirmoi gjithashtu se Londra po diskuton me partnerët evropianë mundësitë për të ardhmen e marrëdhënieve me BE-në, pas deklaratave të kryeministrit Andy Burnham për një afrim më të madh, përfshirë mundësinë e lidhjeve më të ngushta me bashkimin doganor ose tregun e përbashkët.
Ministri nuk dha detaje mbi modelin që favorizon qeveria britanike, por tha se Burnham pritet të flasë më gjerësisht mbi këtë çështje rreth kohës së samitit të ardhshëm me Bashkimin Evropian.
