Shtetet anëtare të BE-së kanë rënë dakord për një paketë të 18-të sanksionesh që synon Rusinë, pas pushtimit të Ukrainës, thanë sot disa diplomatë.
Paketa e sanksioneve synon sektorët financiarë dhe të energjisë të Rusisë dhe vjen në përgjigje të refuzimit të presidentit Vladimir Putin për të rënë dakord për një armëpushim pa kushte në Ukrainë.
Sllovakia e kishte bllokuar paketën, duke përmendur shqetësime në lidhje me importet e saj të gazit. Dje, kryeministri Robert Fico tha se kishte udhëzuar përfaqësuesit e Sllovakisë të miratonin masat.
Sllovakia, e cila më parë kishte bllokuar miratimin e kësaj pakete të re sanksionesh, e 18-ta që nga pushtimi i Ukrainës nga Rusia në shkurt 2022, më në fund pranoi të hiqte veton e saj pasi mori garanci.
Bratislava e përdori këtë veto për të ushtruar presion mbi Komisionin Evropian që të garantonte furnizimet e saj me gaz, në një kohë kur BE-ja po kërkon të ndalojë plotësisht importet e gazit rus deri në vitin 2027.
Këto sanksione të reja përfshijnë, ndër të tjera, një ulje të pragut të çmimit për naftën bruto ruse, e cila tani është vendosur në pak mbi 45 dollarë për fuçi, 15% më e ulët se çmimi mesatar i tregut të një fuçie nafte ruse, sipas këtyre burimeve.
Pragu ishte vendosur më parë në 60 dollarë për fuçi, një çmim që konsiderohet shumë i lartë duke pasur parasysh çmimet aktuale të naftës.
“Bashkimi Evropian sapo ka miratuar një nga paketat më të ashpra të sanksioneve kundër Rusisë deri më sot”, tha shefja e politikës së jashtme të BE-së, Kaja Kallas.
Të gjithë 27 anëtarët e BE-së duhet të mbështesin sanksionet e reja përpara se ato të mund të zbatohen.
