Kryetari i Grupit Parlamentar të Partisë Socialiste, Taulant Balla, gjatë fjalës së tij në Asamblenë Kombëtare të PS-së, u ndal te zgjedhjet vendore të vitit 2027 dhe rëndësia e përzgjedhjes së kandidatëve për kryetarë bashkie.
Balla theksoi se objektivi i socialistëve është fitorja në 46 bashkitë e vendit, ndërsa procesi i përzgjedhjes së kandidatëve duhet të ketë një perspektivë më të gjerë politike, duke marrë në konsideratë edhe zgjedhjet parlamentare të vitit 2029.
“Objektivi kryesor i Asamblesë Kombëtare është fitorja e 46 bashkive. Kandidatët për kryetar bashkie duhet t’i shohim si njerëzit që do të duhet të drejtojnë fitoren tonë të vitit 2029, mandatin tonë të pestë”, deklaroi Balla.
Përmes këtij qëndrimi, Balla vuri në dukje lidhjen që PS i jep zgjedhjeve vendore të vitit 2027 me objektivin e saj për zgjedhjet e ardhshme parlamentare.
