Tri partitë kryesore pro-pavarësisë në Skoci, Uells dhe Irlandën e Veriut kanë nënshkruar një Memorandum Mirëkuptimi për forcimin e bashkëpunimit dhe mbrojtjen e së drejtës së popujve për vetëvendosje.
Marrëveshja është firmosur nga Partia Kombëtare Skoceze (SNP), Plaid Cymru dhe Sinn Féin. Në të theksohet se Skocia, Uellsi dhe Irlanda kanë histori, identitete dhe tradita politike të ndryshme, por secili komb duhet të ketë të drejtën ta përcaktojë të ardhmen e tij përmes proceseve demokratike.
Partitë zotohen të bashkëpunojnë për rritjen e ambicies politike, krijimin e mundësive të reja ekonomike dhe fuqizimin e zërit të qytetarëve që përfaqësojnë.
Sipas memorandumit, peizazhi politik në ishujt britanikë po ndryshon. Nënshkruesit nënvizojnë se, për herë të parë, Skocia, Uellsi dhe Irlanda e Veriut drejtohen nga kryeministra të partive që mbështesin përkatësisht pavarësinë ose ribashkimin e Irlandës.
“Koha e Westminsterit po shkon drejt fundit”, thuhet në dokument.
Tri partitë argumentojnë se ekziston një alternativë më e mirë: kombe që bashkëpunojnë si të barabarta, shkëmbejnë ide dhe ekspertizë dhe ndërtojnë marrëdhënie mbi respektin reciprok dhe interesat e përbashkëta.
Bashkëpunimi do të përqendrohet te zhvillimi i një ekonomie më të fortë dhe më të drejtë, krijimi i vendeve të punës dhe reduktimi i pabarazive sociale.
Një tjetër përparësi do të jetë shfrytëzimi i burimeve energjetike, veçanërisht i energjisë së rinovueshme, me synimin për të ulur faturat e familjeve dhe bizneseve.
“E ardhmja jonë është në Bashkimin Europian”
Memorandumi i kushton rëndësi të veçantë bashkëpunimit europian dhe ndërkombëtar. SNP-ja, Plaid Cymru dhe Sinn Féin e cilësojnë Brexit-in si një vendim që ka dëmtuar ekonomitë e tyre dhe ka kufizuar mundësitë e qytetarëve.
“Europa është shtëpia jonë e përbashkët dhe ne besojmë se e ardhmja e kombeve tona i përket Bashkimit Europian”, thuhet në marrëveshje.
Partitë angazhohen të forcojnë marrëdhëniet me Europën dhe të krijojnë mundësi të reja për tregtinë, investimet, kulturën dhe bashkëpunimin ndërkombëtar.
Në dokument theksohet gjithashtu se asnjë qeveri në Westminster nuk duhet të ketë të drejtën të bllokojë proceset demokratike apo t’i pengojë popujt të vendosin për të ardhmen e tyre.
Megjithatë, tri partitë pranojnë se përfaqësojnë objektiva të ndryshëm kushtetues. SNP-ja kërkon pavarësinë e Skocisë, Plaid Cymru mbështet pavarësinë e Uellsit, ndërsa Sinn Féin synon ribashkimin e Irlandës.
Për këtë arsye, memorandumi përcakton se secili komb do ta zgjedhë në mënyrë të pavarur rrugën dhe kohën e realizimit të aspiratave të tij politike.
