Presidenti amerikan Donald Trump ka miratuar një marrëveshje me Arabinë Saudite për zhvillimin e një programi bërthamor civil, e cila mund t’i hapë rrugën edhe pasurimit të uraniumit në mbretëri, raportoi Wall Street Journal, duke cituar burime nga administrata amerikane.

Marrëveshja, e cila parashikohet të zgjasë 30 vjet dhe vlerësohet në dhjetëra miliarda dollarë, i jep kompanive amerikane një rol qendror në ndërtimin e infrastrukturës bërthamore saudite, pa pjesëmarrjen e konkurrentëve të tjerë ndërkombëtarë.

Sipas raportimit, dokumenti parashikon edhe mundësinë e ndërtimit të një impianti për pasurimin e uraniumit, nëse kjo konsiderohet e nevojshme.

Administrata amerikane argumenton se struktura e marrëveshjes i garanton Shteteve të Bashkuara një kontroll de facto mbi programin bërthamor civil të Arabisë Saudite, me synimin që ai të mos devijojë drejt përdorimit ushtarak.

Megjithëse marrëveshja mund të përballet me kundërshtime në Kongres, Wall Street Journal vëren se ligjvënësit kanë pak gjasa ta bllokojnë atë, pasi për të kapërcyer një veto të mundshme presidenciale do të nevojitej miratimi i një rezolute të përbashkët me shumicë prej dy të tretash.

Ndërkohë, në natën e njëmbëdhjetë të operacioneve ushtarake kundër Iranit, Komanda Qendrore e SHBA-së (CENTCOM) njoftoi se forcat amerikane goditën qendra operative ushtarake iraniane, kapacitete detare, hangarë avionësh, depo dronësh dhe infrastrukturë logjistike ushtarake.

Sipas CENTCOM-it, objektivi i operacionit ishte reduktimi i mëtejshëm i aftësisë së Iranit për të kërcënuar trafikun tregtar në Ngushticën e Hormuzit, një nga rrugët detare më strategjike për transportin e naftës dhe gazit në botë.

Edhe sekretari amerikan i Shtetit, Marco Rubio, paralajmëroi se lejimi i Iranit për të kontrolluar Ngushticën e Hormuzit do të krijonte një precedent të rrezikshëm për sigurinë ndërkombëtare.

“Nëse lejojmë që një shtet të kontrollojë një rrugë ujore ndërkombëtare, të vendosë tarifa kalimi dhe të hedhë në erë anijet nëse ato nuk paguajnë, do të krijojmë një precedent shumë të rrezikshëm që mund të përsëritet në pjesë të tjera të botës”, deklaroi Rubio.