Presidenti i Shteteve të Bashkuara, Donald Trump, ka njoftuar zyrtarisht Kongresin se SHBA është rikthyer në luftë me Iranin, duke i dhënë administratës së tij një afat të ri 60-ditor për të zhvilluar operacione ushtarake pa miratimin e Kongresit.

Në një letër drejtuar ligjvënësve më 10 korrik, Trump argumenton se sulmet ushtarake të nisura më 7 korrik janë “veprime ushtarake në përputhje me përgjegjësinë time për të mbrojtur amerikanët dhe interesat e Shteteve të Bashkuara brenda dhe jashtë vendit”.

Vendimi vjen në një moment kur tensionet mes Uashingtonit dhe Teheranit janë përshkallëzuar sërish, me përplasjet që janë përqendruar rreth Ngushticës së Hormuzit, një nga rrugët më strategjike për transportin botëror të naftës.

Trump deklaroi të hënën se SHBA do të rivendosë bllokadën ndaj Iranit dhe do të marrë kontrollin e Ngushticës së Hormuzit, duke paralajmëruar gjithashtu vendosjen e tarifave për anijet që kalojnë në këtë korridor detar.

Njoftimi për Kongresin vjen pasi presidenti amerikan shpalli zyrtarisht fundin e armëpushimit dymujor me Iranin. Marrëveshja e armëpushimit, e shpallur fillimisht në prill, ishte shoqëruar me shkelje të vazhdueshme nga të dyja palët, megjithëse administrata amerikane kishte këmbëngulur se lufta nuk kishte rifilluar plotësisht.

Sipas Komandës Qendrore të SHBA-së (CENTCOM), forcat amerikane kanë goditur më shumë se 300 objektiva ushtarake iraniane gjatë javës së fundit, si përgjigje ndaj sulmeve të vazhdueshme të Iranit në zonën e Ngushticës së Hormuzit.

CENTCOM njoftoi gjithashtu se të hënën u kryen sulme të reja me urdhër të presidentit Trump, duke theksuar se operacionet do të vazhdojnë për të dobësuar aftësitë ushtarake të Iranit dhe për të mbrojtur lundrimin ndërkombëtar.

Zhvillimet e fundit pritet të intensifikojnë përplasjet politike në Kongres, ku një pjesë e republikanëve dhe demokratëve kanë kërkuar kufizimin e kompetencave të presidentit për të zhvilluar luftë pa autorizimin e ligjvënësve.

Muajin e kaluar, Senati dhe Dhoma e Përfaqësuesve miratuan rezoluta simbolike që kërkonin ndërprerjen e operacioneve ushtarake kundër Iranit pa miratimin e Kongresit, megjithëse ato nuk kanë fuqi detyruese ligjore.

Në letrën drejtuar Kongresit, Trump thekson se forcat amerikane mbeten të gatshme të ndërmarrin veprime të tjera ushtarake “sa herë që të jetë e nevojshme” për të eliminuar kërcënimet ndaj SHBA-së, aleatëve dhe partnerëve të saj dhe për të detyruar Iranin të ndalojë aktivitetet që, sipas Uashingtonit, rrezikojnë sigurinë rajonale dhe ndërkombëtare.