Liderja e ekstremit të djathtë në Francë, Marine Le Pen, ka konfirmuar se do të kandidojë në zgjedhjet presidenciale të vitit të ardhshëm, pavarësisht vendimit të gjykatës që la në fuqi dënimin e saj për përvetësim fondesh publike.

Një trupë prej tre gjyqtarësh konfirmoi fajësinë e Le Pen, por i uli ndalimin për të kandiduar në poste publike. Gjykata e dënoi gjithashtu me një vit arrest shtëpiak, vendim të cilin ajo ka bërë të ditur se do ta apelojë.

Në një intervistë për televizionin francez TF1, Le Pen deklaroi se do të jetë kandidatja e partisë së saj, Tubimi Kombëtar (National Rally), ndërsa presidenti i partisë, Jordan Bardella, do të jetë kandidati i saj për postin e kryeministrit.

“Unë jam kandidatja për zgjedhjet presidenciale. Ne u ofrojmë francezëve një dyshe: presidente dhe kryeministër. Kjo dyshe është e fortë dhe me bindje të qarta. Është një formulë fituese”, u shpreh ajo.

Le Pen, e cila ka kandiduar tre herë më parë për presidencën, synon të udhëheqë edhe një herë partinë në përpjekjen për të marrë drejtimin e Francës. Megjithatë, mbetet e paqartë nëse ajo do të arrijë të fitojë, pasi përballet ende me procesin gjyqësor dhe mundësinë e një dënimi përfundimtar.

Sondazhet e kryera para vendimit të gjykatës tregonin se Le Pen ka gjasa të kalojë në raundin e dytë të zgjedhjeve, por të humbasë nëse përballet me një kandidat të qendrës.

Megjithatë, mbështetësit e saj besojnë se kjo është mundësia më e mirë deri më tani për të fituar presidencën, ndërsa disa analistë vlerësojnë se procesi gjyqësor mund ta forcojë imazhin e saj tek elektorati, duke e paraqitur si një figurë të përndjekur politikisht.

Vendimi pritet të ndikojë edhe në balancat brenda Tubimit Kombëtar, pasi Le Pen rimerr drejtimin e plotë politik të partisë, ndërsa pritet të menaxhojë edhe dallimet programore që janë shfaqur muajt e fundit me Jordan Bardella.