Britania shkon në samitin e NATO-s pa plan afatgjatë për rritjen e shpenzimeve ushtarake

Britania e Madhe do të marrë pjesë në samitin e NATO-s në Ankara pa një plan afatgjatë për të përmbushur objektivin e aleancës për rritjen e shpenzimeve të mbrojtjes, një zhvillim që pritet të shtojë presionin ndaj Londrës.

Ministri britanik i Mbrojtjes, Dan Jarvis, deklaroi për POLITICO se hartimi i një plani të plotë financiar për përmbushjen e angazhimeve ndaj NATO-s është “mision kritik” dhe duhet të realizohet sa më shpejt.

“Ky është mesazhi që u kam dhënë partnerëve të NATO-s në Bruksel dhe që do ta përsëris edhe në Ankara”, u shpreh Jarvis nga bordi i aeroplanmbajtëses HMS Prince of Wales, e cila ndodhet pranë Rrethit Arktik.

Qeveria britanike ka prezantuar së fundmi Planin e Investimeve në Mbrojtje, i cili synon ta çojë buxhetin e mbrojtjes në 2.7% të Prodhimit të Brendshëm Bruto deri vitin e ardhshëm. Megjithatë, dokumenti nuk përmban një plan konkret për arritjen e objektivit të NATO-s prej 3.5% të PBB-së deri në vitin 2035.

Jarvis nuk konfirmoi nëse Britania do ta arrijë këtë objektiv, por theksoi se qeveria ka përmbushur tashmë pragun prej 1.5% të PBB-së për investime në siguri, përfshirë mbrojtjen kibernetike, rrugët dhe portet.

Ai shtoi se do t’i kërkojë kryeministrit të ardhshëm, Andy Burnham, të paraqesë një plan të financuar për përmbushjen e angazhimeve ndaj NATO-s në rishikimin e ardhshëm të shpenzimeve publike.

Sipas Ministrisë së Financave britanike, qeveria e re do të duhet të gjejë rreth 4.7 miliardë paund kursime në buxhetin e parë për të financuar plotësisht planin e investimeve në mbrojtje, çka mund të sjellë shkurtime në sektorë të tjerë publikë.

Ndërkohë, ekspertët paralajmërojnë se mungesa e një strategjie afatgjatë mund të krijojë përshtypjen e paqëndrueshmërisë së Britanisë në prag të samitit të NATO-s, ku aleatët pritet të diskutojnë rritjen e kapaciteteve ushtarake dhe ndarjen e barrës së mbrojtjes.