Britania intercepton avion rus pranë grupit të saj aeroplanmbajtës në Arktik
Britania e Madhe ka interceptuar një avion patrullues detar rus në Detin Norvegjez, pasi ai iu afrua në mënyrë të përsëritur grupit goditës të aeroplanmbajtëses HMS Prince of Wales, njoftoi Ministria britanike e Mbrojtjes.
Sipas autoriteteve britanike, avioni rus i tipit “Bear F” kreu një manovër të cilësuar si “të pasigurt dhe joprofesionale”, duke hedhur një numër të madh sonobojash – pajisje që përdoren për të zbuluar dhe gjurmuar nëndetëset – pranë aeroplanmbajtëses britanike.
Avioni u interceptua më 2 korrik nga avionë luftarakë F-35 të ngritur nga HMS Prince of Wales, e cila është aeroplanmbajtësja e parë evropiane që zhvillon operacione të mbrojtjes ajrore të NATO-s me këta avionë të gjeneratës së pestë.
Incidenti ndodhi në një kohë kur Britania ka marrë për herë të parë komandën e forcës së reagimit të shpejtë të NATO-s, e cilësuar nga Ministria e Mbrojtjes si “maja e shtizës” e aleancës, me aftësi për t’u dislokuar kudo në botë brenda pak ditësh.
Ndërkohë, mediat britanike raportuan se superjahti i presidentit rus Vladimir Putin, me vlerë rreth 100 milionë paund, po lundron përgjatë brigjeve të Norvegjisë në rrugën e kthimit drejt Rusisë.
I pyetur nëse HMS Prince of Wales po monitoronte lëvizjet e jahtit, ministri britanik i Mbrojtjes, Dan Jarvis, nuk dha një përgjigje të drejtpërdrejtë, por deklaroi: “Ne e dimë se ku ndodhet.”
Ai shtoi se lëvizja e jahtit mund të interpretohet si një tregues se presidenti rus Vladimir Putin po përballet me presion në rritje.
