Trump kryen fluturimin e parë me Air Force One të dhuruar nga Katari
Presidenti i Shteteve të Bashkuara, Donald Trump, udhëtoi të mërkurën drejt Dakotës së Veriut me avionin e ri Air Force One, një Boeing 747-8 luksoz me vlerë rreth 400 milionë dollarë, i dhuruar nga qeveria e Katarit.
Ky ishte fluturimi i parë zyrtar i avionit, të cilin Trump e prezantoi muajin e kaluar si zëvendësues të përkohshëm të Boeing 747-200 që ka shërbyer si avion presidencial amerikan për më shumë se tre dekada. Avioni i ri pritet të përdoret deri në dorëzimin e flotës së re presidenciale Boeing, që pritet brenda dy viteve të ardhshme.
Dhurata nga Katari shkaktoi reagime të forta si nga demokratët ashtu edhe nga republikanët, duke ngritur shqetësime për konflikt të mundshëm interesi. Shtëpia e Bardhë ka mohuar çdo pretendim për korrupsion, duke këmbëngulur se pranimi i avionit është në përputhje me ligjin.
Përpara nisjes nga Baza Ajrore Andrews, Trump e cilësoi Boeing 747-8 si “ndoshta avionin më të madh komercial të ndërtuar ndonjëherë”.
“Jam i emocionuar për fluturimin e parë. Askush nuk ka parë ndonjëherë diçka të tillë”, deklaroi ai.
Trump shtoi se Shtetet e Bashkuara nuk do të kishin ndërtuar një avion të tillë për shkak të kostos së lartë.
“Sinqerisht, ne nuk mund të ndërtonim një aeroplan të tillë sepse nuk do të ishim të gatshëm të shpenzonim paratë e nevojshme. Ata shpenzuan shuma marramendëse”, u shpreh presidenti amerikan.
Ndërkohë, drejtori i komunikimit në Shtëpinë e Bardhë, Steven Cheung, publikoi në rrjetin X fotografi nga brendësia e avionit, ku shfaqen tavolina të mëdha konferencash, ambiente luksoze dhe ulëse lëkure.
