Marrëveshja mes Shteteve të Bashkuara dhe Iranit për t’i dhënë fund konfliktit në Lindjen e Mesme po përballet me sfidën e saj të parë, pasi kontaktet e para të planifikuara në Gjenevë janë shtyrë mes tensioneve të vazhdueshme në Liban.

Sipas raportimeve të rrjetit libanez Al-Mayadeen, delegacioni negociator iranian ka pezulluar në momentet e fundit udhëtimin drejt Zvicrës, duke argumentuar se sulmet e vazhdueshme izraelite në jug të Libanit bien ndesh me frymën e Memorandumit të Mirëkuptimit të nënshkruar së fundmi mes Uashingtonit dhe Teheranit.

Burimet bëjnë të ditur se Irani kishte paralajmëruar më herët SHBA-në dhe ndërmjetësit ndërkombëtarë se situata në Liban do të ishte një element kyç për ecurinë e negociatave. Sipas Teheranit, operacionet izraelite brenda territorit libanez përbëjnë shkelje të klauzolave fillestare të marrëveshjes.

Pak orë më vonë, edhe administrata amerikane konfirmoi shtyrjen e vizitës së zëvendëspresidentit J.D. Vance në Gjenevë. Shtëpia e Bardhë sqaroi se vendimi lidhet me çështje logjistike dhe organizative të fazës së ardhshme të negociatave.

“Planet për bisedimet teknike nuk janë finalizuar ende dhe delegacioni amerikan është gati të niset sapo të jetë e mundur. Logjistika e këtyre negociatave nuk ka qenë kurrë e thjeshtë apo e parashikueshme”, deklaroi një zëdhënës i administratës amerikane.

Pavarësisht vonesave diplomatike, tregjet financiare reaguan pozitivisht ndaj marrëveshjes. Investitorët vijojnë të shpresojnë se procesi do të çojë në rihapjen e plotë të Ngushticës së Hormuzit dhe normalizimin e tregjeve globale të energjisë.

Në Azi, indeksi japonez Nikkei 225 u rrit me 0.68%, ndërsa Kospi i Koresë së Jugut fitoi 0.78%. Rritje shënuan edhe tregjet amerikane, me Dow Jones që u ngjit me 0.14%, S&P 500 me 1.08% dhe Nasdaq me 1.91%.

Edhe tregu i naftës vijoi tendencën rënëse. Nafta Brent u tregtua me 79.63 dollarë për fuçi, ndërsa WTI amerikane zbriti në 76.05 dollarë për fuçi. Analistët vlerësojnë se çmimet po shkojnë drejt humbjeve javore prej rreth 9%, si pasojë e uljes së frikës për ndërprerje të furnizimeve globale.

Megjithëse optimizmi në tregje mbetet i lartë, vëmendja e diplomacisë ndërkombëtare është përqendruar te raundi i ardhshëm i negociatave teknike, ku pritet të diskutohen çështjet më të ndjeshme të marrëveshjes, përfshirë programin bërthamor iranian, heqjen graduale të sanksioneve dhe funksionimin afatgjatë të Ngushticës së Hormuzit.