Bashkëpunimi ushtarak mes Italisë dhe Shqipërisë ka shënuar një tjetër hap përpara me zhvillimin e një stërvitjeje të avancuar në bazën ajrore të NATO-s në Kuçovë, ku Forcat Ajrore Italiane demonstruan kapacitetet e tyre në operacionet Combat Search and Rescue (Combat SAR).

Sipas një njoftimi të publikuar nga Forcat Ajrore Italiane dhe të cituar nga italpress.com, aktiviteti u zhvillua më 10 qershor në kuadër të Planit të Bashkëpunimit Dypalësh mes Italisë dhe Shqipërisë.

Në stërvitje morën pjesë dy helikopterë HH-101A Caesar të Fluturimit të 9-të të Grazzanise, të specializuar në misionet e rikuperimit të personelit (Personnel Recovery), si dhe dy avionë luftarakë F-2000 të Fluturimit të 36-të të Gioia del Colle, të cilët kryen detyrën e mbrojtjes së misioneve të shpëtimit në mjedise armiqësore.

Forca Ajrore Shqiptare ofroi mbështetjen logjistike dhe infrastrukturore përmes bazës së NATO-s në Kuçovë, ndërsa Qendra e Kontrollit dhe Raportimit (QKR) siguroi koordinimin dhe monitorimin e operacioneve gjatë gjithë aktivitetit.

Në deklaratën e tyre, Forcat Ajrore Italiane e cilësuan stërvitjen si një mundësi konkrete për forcimin e bashkëpunimit ndërmjet vendeve aleate, duke theksuar rëndësinë e shkëmbimit të procedurave dhe përvojave operacionale për rritjen e standardizimit dhe ndërveprueshmërisë në misionet komplekse.

Sipas autoriteteve italiane, aktiviteti konfirmon vëmendjen strategjike që Italia i kushton Ballkanit Perëndimor, si dhe rëndësinë e partneritetit me Shqipërinë, e konsideruar një aleate kyçe për stabilitetin dhe sigurinë në rajon.

Baza e NATO-s në Kuçovë, e modernizuar së fundmi, po konsolidohet gjithnjë e më shumë si një qendër strategjike për stërvitjet dhe operacionet e Aleancës në Ballkanin Perëndimor.