SHBA pritet të reduktojë gradualisht praninë në KFOR, NATO rishikon misionin në Kosovë

Shtetet e Bashkuara pritet të bëjnë ndryshime në kontributin e tyre në misionin paqeruajtës të NATO-s në Kosovë, KFOR, në kuadër të një rishikimi më të gjerë të pranisë ushtarake të Aleancës në vend.

Një zyrtar i Komandës Evropiane të SHBA-së (EUCOM) konfirmoi për Radion Evropa e Lirë se vendimi bazohet në vlerësimin më të fundit të Komandës Supreme të Forcave Aleate në Evropë (SHAPE), e cila ka rekomanduar optimizimin e vendosjes së forcave në terren.

“Komanda Evropiane e SHBA-së do të bëjë një përshtatje graduale dhe të bazuar në vlerësimin e rrezikut të kontributit amerikan në KFOR, në përputhje me rishikimin e udhëhequr nga SHAPE”, tha zyrtari amerikan, pa dhënë detaje për numrin e trupave që mund të preken.

Njoftimi vjen pak ditë pasi NATO bëri të ditur se synon të reduktojë gradualisht praninë e saj në Kosovë gjatë vitit të ardhshëm, duke argumentuar se situata e sigurisë në vend ka shënuar përmirësime.

Aktualisht, KFOR-i përbëhet nga më shumë se 4.600 trupa nga 31 vende, ndërsa Shtetet e Bashkuara kontribuojnë me rreth 590 ushtarë. SHBA-ja mban gjithashtu kampin Bondsteel pranë Ferizajt, bazën më të madhe ushtarake amerikane në Ballkan.

Pavarësisht planeve për rishikim, EUCOM theksoi se Uashingtoni vazhdon ta konsiderojë KFOR-in një komponent kyç për stabilitetin dhe sigurinë në Ballkanin Perëndimor.

Ndërkohë, analistët e sigurisë kanë paralajmëruar se çdo reduktim i ndjeshëm i pranisë amerikane mund të ketë pasoja për stabilitetin rajonal. Eksperti amerikan Mark Montgomery e cilësoi një tërheqje të mundshme si “destabilizuese”, duke argumentuar se prania e SHBA-së mbetet faktor i rëndësishëm parandalues në marrëdhëniet mes Kosovës dhe Serbisë.

Sipas tij, ruajtja e nivelit aktual të angazhimit amerikan në KFOR është një investim me kosto të ulët, por me rëndësi të lartë strategjike për sigurinë e rajonit.