BE vlerëson progresin e Shqipërisë, thekson nevojën për zbatimin e reformave

Komiteti për Punët e Jashtme i Parlamentit Europian ka përgëzuar Shqipërinë për progresin në bisedimet e pranimit në Bashkimin Europian, duke theksuar se zbatimi i plotë i reformave të miratuara mbetet thelbësor.

Në një raport të miratuar me 58 vota pro, 7 kundër dhe 7 abstenime, eurodeputetët vlerësojnë angazhimin e fortë të vendit për integrimin europian dhe përparimin e shpejtë në vitet e fundit. Megjithatë, ata i bëjnë thirrje autoriteteve që legjislacioni i miratuar të zbatohet në praktikë.

Raporti evidenton disa sfida të vazhdueshme, si polarizimi politik, forcimi i sundimit të ligjit dhe konsolidimi i reformave kundër korrupsionit. Po ashtu, theksohet se cilësia e reformave do të përcaktojë nëse objektivi për mbylljen e negociatave deri në vitin 2027 do të arrihet.

Në fushën e drejtësisë, eurodeputetët vërejnë progres në reformën gjyqësore, por paralajmërojnë për presione dhe kërcënime politike ndaj sistemit, që mund të cenojnë pavarësinë e tij. Lufta kundër korrupsionit mbetet një shqetësim serioz, veçanërisht në nivelet e larta, ndërsa kërkohet forcim i hetimeve dhe dënimeve përfundimtare.

Raporti nënvizon gjithashtu rëndësinë e luftës kundër krimit të organizuar, përfshirë pastrimin e parave dhe trafikun e drogës.

Sa i përket lirisë së medias dhe administratës publike, kërkohen përpjekje të mëtejshme për të garantuar pluralizmin, si dhe reforma për një administratë profesionale dhe të depolitizuar.

Eurodeputetët vlerësojnë edhe përafrimin e plotë të Shqipërisë me politikën e jashtme dhe të sigurisë të BE-së, si dhe rolin e saj në stabilitetin rajonal.

Raporti pritet të votohet në një nga seancat plenare të ardhshme të Parlamentit Europian.

Raportuesi Andreas Schieder u shpreh se Shqipëria është ndër vendet pararojë në procesin e integrimit dhe se objektivi për përfundimin e negociatave deri në vitin 2027 është realist, duke theksuar edhe rëndësinë e dimensionit social dhe të drejtave të punëtorëve në këtë proces.