Ministri i Bujqësisë, Andis Salla, ka deklaruar se Shqipëria ka përmbushur të gjitha kërkesat e Bashkimit Europian për zhbllokimin e fondeve IPARD dhe tashmë është në pritje të një përgjigjeje nga institucionet europiane.
Deklarata vjen pak ditë pas publikimit të progres-raportit të Komisionit Europian, ku theksohej se fondet vijojnë të jenë të bllokuara për shkak të mosplotësimit të të gjitha kritereve për mbrojtjen e tyre nga keqmenaxhimi.
Në një intervistë për emisionin “Portofol” me gazetaren Eliza Gjediku në Report TV, ministri Salla tha se institucionet shqiptare kanë dorëzuar dokumentacionin e kërkuar dhe kanë përmbushur detyrat e përcaktuara nga BE-ja.
“IPARD është shumë i domosdoshëm për Shqipërinë, e ka bërë sektorin të ecë me një ritëm tjetër. Ne e kemi bërë të gjithë dokumentacionin e kërkuar, i kemi plotësuar të gjitha detyrat që na janë lënë”, deklaroi Salla.
Sipas tij, dosja është përfunduar dhe autoritetet shqiptare janë në pritje të vlerësimit nga Bashkimi Europian.
“Është përmbushur e gjithë dosja e plotë dhe jemi në pritje të përgjigjes së tyre, në mënyrë që ne të jemi transparentë, por edhe të gatshëm për ta zbatuar”, shtoi ministri.
148 milionë euro për sektorin e bujqësisë
Salla bëri të ditur se shuma e parashikuar për mbështetjen e bujqësisë shqiptare arrin në 148 milionë euro, duke përfshirë fondet europiane dhe kontributin financiar të qeverisë shqiptare.
Sipas ministrit, programi IPARD ka luajtur një rol të rëndësishëm në zhvillimin dhe modernizimin e sektorit bujqësor, ndaj rifillimi i financimeve konsiderohet prioritet.
Pse janë bllokuar fondet IPARD?
Financimet e programit IPARD III mbeten të bllokuara që prej gushtit 2023, pas dyshimeve për abuzime me fondet e programit të mëparshëm IPARD II.
Çështja është gjithashtu objekt hetimi nga organet shqiptare të drejtësisë.
Në progres-raportin e fundit, Komisioni Europian ka evidentuar se Shqipëria ende nuk ka përmbushur të gjitha kërkesat që lidhen me garantimin e administrimit dhe mbrojtjes së fondeve.
Megjithëse ministri Salla deklaron se dokumentacioni dhe detyrimet janë përmbushur, zhbllokimi i fondeve mbetet në varësi të vlerësimit dhe vendimmarrjes së institucioneve të Bashkimit Europian.
Deri në marrjen e një përgjigjeje zyrtare, financimet e programit IPARD III nuk kanë rifilluar.
