Lugina e Valbonës, një prej destinacioneve më të njohura të turizmit malor në Shqipëri, ofron një peizazh të veçantë gjatë stinës së vjeshtës, kur pyjet dhe malet mbulohen nga një larmi ngjyrash.
Kryeministri Edi Rama ka ndarë sot në rrjetet sociale pamje nga Valbona, duke promovuar bukuritë natyrore të kësaj zone në zemër të Alpeve Shqiptare.
Gjatë kësaj periudhe, pyjet e ahut dhe gështenjës marrin nuanca të arta, të kuqe dhe portokalli, duke krijuar një kontrast me gjelbërimin e pishave, bredhave dhe masiveve të tjera halore.
Peizazhet malore, ajri i pastër dhe qetësia e natyrës e bëjnë Valbonën një destinacion tërheqës për turistët vendas dhe të huaj, veçanërisht për ata që preferojnë ecjet në natyrë dhe fotografinë.
Përveç bukurive natyrore, zona ofron mundësi për njohjen me traditat, gastronominë dhe mikpritjen karakteristike të banorëve të veriut.
Pamjet e publikuara nga kryeministri sjellin në vëmendje potencialin turistik të Valbonës edhe jashtë sezonit veror, duke promovuar turizmin malor gjatë gjithë vitit.
