Mbretëria e Bashkuar dhe Gjermania synojnë të testojnë, zhvillojnë dhe më pas të integrojnë së bashku inteligjencën artificiale në forcat e tyre të armatosura.
Sekretari britanik i Mbrojtjes, Wes Streeting, njoftoi se bashkëpunimi do të mbështetet në zgjerimin e projektit të përbashkët të sigurisë kibernetike “Cyber Lighthouse”, duke përfshirë edhe teknologjitë e IA-së.
Në një shkrim për gazetën “Frankfurter Allgemeine Zeitung”, përpara takimit të parashikuar me homologun gjerman Boris Pistorius në Berlin, Streeting tha se nisma synon forcimin e kapaciteteve mbrojtëse të dy vendeve.
“Përmes testimit të përbashkët, zhvillimit dhe, në fund, futjes së inteligjencës artificiale në forcat tona të armatosura, do të thellojmë bashkëpunimin dhe do të mbajmë ritmin me ata që kërkojnë të na dëmtojnë”, shkroi ai.
Plani do të konkretizohet në pranverën e vitit 2027
Përfaqësues të qeverive dhe industrisë së të dy vendeve pritet të takohen në pranverën e vitit 2027 për të përcaktuar mënyrën e zbatimit të nismës.
Deri tani nuk janë njoftuar sisteme konkrete, programe apo buxhete të posaçme për këtë bashkëpunim në inteligjencën artificiale.
Streeting deklaroi gjithashtu se kompanitë gjermane kanë angazhuar 800 milionë paund për industrinë britanike të mbrojtjes që nga nënshkrimi i paktit dypalësh të mbrojtjes në vitin 2024.
Mes tyre është kompania Helsing, me seli në Mynih, e cila hapi vitin e kaluar një fabrikë në Plymouth për prodhimin e mjeteve nënujore pa ekuipazh, të pajisura me inteligjencë artificiale dhe të projektuara për gjurmimin e nëndetëseve kundërshtare.
Përdorimi në rritje i IA-së në luftë ka nxitur edhe kërkesa për kufizime ndërkombëtare. Komiteti Ndërkombëtar i Kryqit të Kuq ka paralajmëruar për një garë armatimesh dhe ka kërkuar rregulla ligjërisht të detyrueshme për sistemet autonome të armëve.
