Kryeministri belg Bart De Wever pritet të takohet të hënën me mbretin Philippe për t’i ofruar dorëheqjen, pasi koalicioni i tij pesëpartiak nuk arriti një marrëveshje për mbulimin e një hendeku buxhetor prej 10 miliardë eurosh.
Negociatat mes drejtuesve të qeverisë vijuan gjatë fundjavës deri në orët e para të së hënës, por përfunduan pa rezultat. E marta konsiderohej si afati jozyrtar për arritjen e kompromisit, në mënyrë që buxheti i vitit të ardhshëm të kalojë në Parlament përpara fundit të vitit.
De Wever kishte përjashtuar mundësinë që Belgjika ta niste vitin e ri me një buxhet të përkohshëm, i cili do t’i lejonte qeverisë të vijonte funksionimin mbi bazën e buxhetit të mëparshëm.
Përplasja për taksat bllokon marrëveshjen
Mosmarrëveshjet kryesore janë shfaqur mes socialistëve flamandë të partisë Vooruit dhe Lëvizjes Reformiste frankofone të qendrës së djathtë.
Socialistët kërkojnë që personat me të ardhura më të larta të kontribuojnë më shumë përmes taksave. Lëvizja Reformiste e kundërshton këtë qasje dhe ka shprehur rezerva edhe ndaj një reforme më të gjerë të Tatimit mbi Vlerën e Shtuar.
Pas ndërprerjes së negociatave, zëvendëskryeministri David Clarinval, përfaqësues i Lëvizjes Reformiste, deklaroi se në tryezë kishte ende “shumë më tepër taksa sesa duhet”. Megjithatë, ai nuk e përjashtoi mundësinë e rifillimit të bisedimeve gjatë së hënës.
Përmes marrëveshjes buxhetore, De Wever synonte t’u tregonte tregjeve financiare se Belgjika po ndërmerr hapa për të përmbushur detyrimet e saj europiane. Deficiti i vendit arriti në 5,2% të Prodhimit të Brendshëm Bruto në vitin 2025 dhe pritet të rritet më tej vitin e ardhshëm.
Koalicioni përballë rrezikut të rrëzimit
Edhe në nëntor të vitit të kaluar, negociatat për buxhetin kaluan afatet e parashikuara. Atëherë De Wever nuk ofroi dorëheqjen, por i kërkoi mbretit Philippe më shumë kohë. Monarku i dha edhe 50 ditë për të siguruar një marrëveshje.
Këtë herë, dështimi i negociatave e ka vendosur koalicionin në prag të shpërbërjes. Ofrimi i dorëheqjes, megjithatë, nuk nënkupton automatikisht zgjedhje të parakohshme.
Nëse vendi shkon drejt një procesi të ri zgjedhor, sondazhet tregojnë mbështetje të fortë për partinë e ekstremit të djathtë Vlaams Belang dhe Partinë e Punëtorëve të ekstremit të majtë.
