Qindra mijëra familje në Ukrainë kanë mbetur pa energji elektrike pas sulmeve ruse ndaj infrastrukturës energjetike, deklaroi të dielën presidenti Volodymyr Zelensky.
Sipas tij, gjatë natës u goditën objekte në katër rajone: Dnipro, Vinnytsia, Zhytomyr dhe Khmelnytskyi. Në shënjestër ishin nënstacione, transformatorë dhe linja që furnizojnë banesat.
“Qindra mijëra familje mbeten pa energji”, shkroi Zelensky në rrjetet sociale, duke e cilësuar intensitetin e sulmeve si jashtëzakonisht të lartë.
Rusia raporton dëme të mëdha nga dronët ukrainas
Ndërkohë, autoritetet ruse raportuan një sulm masiv ukrainas me dronë në rajonin e Nizhny Novgorodit.
Guvernatori Gleb Nikitin deklaroi se gjatë natës dhe mëngjesit ishin shkatërruar mbi 100 dronë dhe se një objekt industrial në distriktin Kstovsky kishte pësuar dëme të konsiderueshme. Sipas të dhënave paraprake të autoriteteve vendase, nuk kishte viktima.
Nikitin paralajmëroi ndërprerje të mundshme të energjisë dhe kufizime të furnizimit me ujë të ngrohtë e ngrohje gjatë riparimeve.
Ai nuk e identifikoi objektin e goditur. Në këtë rajon ndodhet rafineria NORSI, por deklarata e guvernatorit nuk konfirmonte nëse ajo ishte shënjestra.
Të premten, autoritetet e rajonit rus të Samarës akuzuan Ukrainën edhe për sulmin ndaj rafinerisë së Novokuibyshevskut.
Pikëpyetje mbi pezullimin e goditjeve ndaj rafinerive
The Wall Street Journal raportoi të enjten se Kievi kishte pranuar të pezullonte sulmet ndaj rafinerive ruse deri pas zgjedhjeve amerikane të mesmandatit, më 3 nëntor, pas presionit të presidentit Donald Trump.
Sipas raportimit, Ukraina kishte ndalur goditjet me dronë ndaj rafinerive për 72 orë pas njoftimit të një armëpushimi energjetik në tetor. Megjithatë, sulmet ruse ndaj infrastrukturës energjetike ukrainase kishin vijuar.
