Kandidati i pavarur Łukasz Gibała ka fituar zgjedhjet për kryetar bashkie në Krakovë, qytetin e dytë më të madh të Polonisë, duke mposhtur kandidaten e mbështetur nga kryeministri Donald Tusk.
Sipas rezultateve zyrtare, Gibała siguroi 62.12% të votave në balotazhin e së dielës, ndërsa senatorja Monika Piątkowska, e mbështetur nga Koalicioni Qytetar i Tusk, mori 37.88%. Pjesëmarrja në votime ishte 44.27%.
Rezultati përbën një humbje politike për partinë e kryeministrit, e cila kishte mbështetur edhe ish-kryebashkiakun Aleksander Miszalski, të shkarkuar pas një referendumi në muajin maj.
“Qytetarët e Krakovës sapo e rimorën qytetin e tyre! Tani le t’i lëmë mënjanë dallimet dhe të tregojmë se mund të punojmë së bashku”, deklaroi Gibała pas fitores.
Megjithatë, kryebashkiaku i ri do të duhet të bashkëpunojë me forcat e koalicionit qeverisës, pasi Koalicioni Qytetar dhe partia E Majta kontrollojnë së bashku 23 nga 43 vendet në këshillin bashkiak.
Fitorja pas katër përpjekjesh
Kjo ishte përpjekja e katërt e Gibała për të marrë drejtimin e Krakovës. Ish-deputeti dhe këshilltari vendor kishte humbur ngushtë përballë Miszalskit në zgjedhjet e vitit 2024.
Gjatë fushatës, ai u përqendrua te pakënaqësitë e qytetarëve lidhur me borxhin e lartë të bashkisë dhe përpjekjet për vendosjen e një zone me emetime të ulëta ndotëse.
Në raundin e parë, të zhvilluar më 27 shtator, Gibała kryesoi me 36.4% të votave, kundrejt 29.9% të Piątkowskës. Kandidati i partisë opozitare Ligj dhe Drejtësi u rendit i treti me 17.5%.
Piątkowska kishte kërkuar të distancohej nga ish-kryebashkiaku Miszalski, duke argumentuar se lidhjet e ngushta me qeverinë qendrore do të sillnin përfitime për qytetin me rreth 800 mijë banorë.
Sinjal politik përpara zgjedhjeve parlamentare
Humbja në Krakovë vjen në një moment të rëndësishëm për kryeministrin Donald Tusk, ndërsa Polonia përgatitet për zgjedhjet parlamentare të vjeshtës.
Megjithëse Koalicioni Qytetar vijon të kryesojë në sondazhet kombëtare, matjet e fundit tregojnë një skenë politike të fragmentuar.
Dy sondazhe të tetorit, të përfshira në platformën e agregimit ewybory.eu, e vendosin Koalicionin Qytetar në 31.9%, partinë Ligj dhe Drejtësi në 17.7%, Konfederatën në 14% dhe Konfederatën e Kurorës Polake në 8.3%.
Nga aleatët aktualë të qeverisë, vetëm E Majta, me rreth 7%, rezulton mbi pragun elektoral prej 5% në këto sondazhe.
Rezultati në Krakovë i shton presionin politik koalicionit të Tusk, ndërsa partitë përgatiten për garën parlamentare.
