Komisioni Europian nuk po arrin të ecë me të njëjtin ritëm me zhvillimet e shpejta të inteligjencës artificiale. Kritika vjen nga eurodeputeti gjerman Axel Voss, një nga zërat kryesorë të Partisë Popullore Europiane për politikat teknologjike.
Voss, i cili i përket CDU-së së Ursula von der Leyen, kritikoi mënyrën se si Komisioni po zbaton rregullat europiane për inteligjencën artificiale, veçanërisht pas incidenteve të fundit të sigurisë që kanë ngritur pikëpyetje mbi kontrollin e sistemeve autonome.
“E gjithë mënyra e punës së Komisionit Europian nuk është përshtatur me këto zhvillime që ndryshojnë jashtëzakonisht shpejt”, deklaroi Voss në një intervistë për POLITICO.
Në qendër të kritikave është zbatimi i AI Act, ligji i Bashkimit Europian për inteligjencën artificiale. Voss argumenton se mënyra se si po zbatohet aktualisht legjislacioni “nuk është në nivelin ku do të donim të ishte”.
Deklaratat vendosin nën presion edhe Zyrën Europiane për Inteligjencën Artificiale, strukturën e Komisionit që ka përgjegjësi të rëndësishme për mbikëqyrjen dhe zbatimin e rregullave të AI.
Eurodeputeti gjerman kritikoi gjithashtu qasjen më të gjerë të Komisionit ndaj transformimit teknologjik, duke përmendur edhe fjalimin e fundit të presidentes Ursula von der Leyen për gjendjen e Bashkimit.
Sipas tij, ambicia e Brukselit për zhvillimet digjitale nuk është e mjaftueshme përballë ritmit me të cilin po evoluon teknologjia.
Kush paguan kur AI shkakton dëme?
Një nga boshllëqet kryesore që Voss kërkon të adresohet lidhet me përgjegjësinë ligjore të kompanive të inteligjencës artificiale.
“Ajo që ka qenë e gabuar që nga fillimi i këtij mandati është se nuk është menduar për përgjegjësinë e AI-së. Kjo mund të ketë ndikim te çdo kompani”, tha ai.
Debati po merr gjithnjë e më shumë peshë edhe në Parlamentin Europian. Disa eurodeputetë po shqyrtojnë mundësinë e forcimit të dispozitave për përgjegjësinë ndaj produkteve, në mënyrë që të përcaktohet më qartë se kush mban përgjegjësi kur një sistem i inteligjencës artificiale shkakton dëme.
Diskutimi është intensifikuar ndërsa sistemet e AI po bëhen gjithnjë e më autonome dhe po përdoren në një numër në rritje sektorësh, duke ngritur pyetje të reja jo vetëm për sigurinë, por edhe për përgjegjësinë juridike të kompanive që i zhvillojnë dhe i vendosin ato në përdorim.
