Aktorë të njohur të kinematografisë turke, mes tyre Tuba Büyüküstün, Barış Arduç dhe Meryem Uzerli, morën pjesë në Konferencën e Kombeve të Bashkuara për Ndryshimet Klimatike, COP31, që po zhvillohet në Antalia të Turqisë.
Artistët u mblodhën në pavijonin e Turqisë, në zonën blu të konferencës, ku përcollën mesazhe për rëndësinë e bashkëpunimit ndërkombëtar dhe nevojën për veprime konkrete përballë krizës klimatike.
Pjesëmarrja e figurave të njohura të ekranit synon të rrisë ndërgjegjësimin publik për sfidat mjedisore dhe përgjegjësinë e përbashkët për mbrojtjen e planetit.
Barış Arduç: Koha për të kthyer premtimet në veprime
Aktori Barış Arduç theksoi se, pas angazhimeve të ndërmarra në kuadër të Marrëveshjes së Parisit për Klimën, është e nevojshme që premtimet e vendeve të shndërrohen në masa konkrete.
Mesazhi i tij u përqendrua te rëndësia e zbatimit të angazhimeve ndërkombëtare për kufizimin e ndryshimeve klimatike dhe mbrojtjen e mjedisit.
Ndërkohë, aktorja Tuba Büyüküstün, e njohur edhe për angazhimin e saj si ambasadore e vullnetit të mirë e UNICEF-it, vuri theksin te përgjegjësia ndaj fëmijëve dhe brezave të ardhshëm.
Ajo nënvizoi se vendimet e marra në konferencat ndërkombëtare duhet të shoqërohen me veprime konkrete, në mënyrë që të garantohet një e ardhme më e sigurt për brezat që do të vijnë.
Meryem Uzerli: COP31, mundësi për të rritur ndërgjegjësimin
Edhe aktorja Meryem Uzerli vlerësoi rëndësinë e organizimit të COP31 në Turqi, duke e cilësuar praninë e liderëve botërorë si një mundësi për të tërhequr më shumë vëmendje ndaj ndryshimeve klimatike.
Sipas saj, konferenca krijon hapësirë për të nxitur ndërgjegjësimin dhe për të forcuar angazhimin e përbashkët në mbrojtje të mjedisit.
Mesazhe të ngjashme përcollën edhe artistë e sportistë të tjerë pjesëmarrës, të cilët theksuan rëndësinë e ruajtjes së deteve, pyjeve dhe burimeve ujore.
Përmes pjesëmarrjes në COP31, figurat e njohura të kinematografisë turke iu bashkuan thirrjeve për veprim kundër ndryshimeve klimatike, duke vënë në dukje se mbrojtja e mjedisit kërkon angazhim jo vetëm nga qeveritë, por edhe nga shoqëria në tërësi.
