Presidenti amerikan Donald Trump u ka kërkuar mbështetësve republikanë që t’i trajtojnë zgjedhjet e ardhshme për Kongresin sikur edhe emri i tij të ishte në fletën e votimit, duke paralajmëruar se një humbje e partisë së tij mund t’u hapë rrugën demokratëve për një tjetër procedurë impeachment-i ndaj tij.
“Bëni sikur po kandidoj, ju lutem. Thjesht bëni sikur, sepse unë jam në fletëvotim”, tha Trump gjatë një aktiviteti elektoral, ndërsa kërkoi mobilizim maksimal të elektoratit republikan.
Presidenti e lidhi drejtpërdrejt rezultatin e zgjedhjeve me kontrollin e Kongresit dhe me mundësinë që demokratët të hapin procedura të reja ndaj tij.
“Nëse nuk fitojmë, ata do të përfundojnë duke më shkarkuar përmes procedurës së impeachment-it”, deklaroi Trump.
Deklarata vjen në një moment kur Trump po shton angazhimin në fushatën për zgjedhjet e ndërmjetme, duke kërkuar të ruajë shumicat republikane në Kongres.
Sipas Kushtetutës amerikane, impeachment-i nis në Dhomën e Përfaqësuesve. Nëse një shumicë e thjeshtë voton për ngritjen e akuzave, presidenti konsiderohet i impeached, ndërsa çështja kalon më pas në Senat.
Për shkarkimin nga detyra kërkohet që dy të tretat e senatorëve të votojnë për dënimin. Pra, impeachment-i nuk nënkupton automatikisht largimin e presidentit nga posti.
Trump është përballur dy herë më parë me impeachment gjatë mandatit të tij të parë, por në të dyja rastet Senati nuk siguroi votat e nevojshme për ta dënuar dhe larguar nga detyra.
