Një koalicion ndërkombëtar i shoqatave të tifozëve ka nisur një peticion online, duke kërkuar dorëheqjen e menjëhershme të presidentit të FIFA-s, Gianni Infantino, si dhe një reformim rrënjësor të mënyrës se si drejtohet futbolli botëror.
Nisma mbështetet nga disa organizata të tifozëve, mes tyre Football Supporters Europe, National Supporters Association dhe French Irresistibles. Ato akuzojnë Infantinon se po vendos interesat dhe rolin e tij mbi vetë futbollin dhe komunitetin që e mbështet atë.
“Futbolli u përket atyre që mbushin stadiumet, që ndjekin klubet dhe ekipet e tyre kombëtare nëpër triumfet dhe dështimet e tyre, që udhëtojnë nëpër vende dhe kontinente, që e kalojnë sportin brez pas brezi dhe e mbajnë gjallë çdo ditë të vitit. Megjithatë, një njeri duket se beson se është më i rëndësishëm se vetë futbolli”, thuhet në deklaratën e përbashkët.
Kërkesat e koalicionit nuk kufizohen vetëm te largimi i presidentit të FIFA-s. Organizatat kërkojnë ndryshime të thella në strukturën vendimmarrëse të institucionit dhe përfshirjen zyrtare të tifozëve dhe futbollistëve në proceset që përcaktojnë të ardhmen e sportit.
Peticioni shton presionin ndaj Infantinos në një periudhë kur drejtimi i FIFA-s po përballet me kritika për mënyrën e qeverisjes dhe vendimmarrjes në futbollin ndërkombëtar.
