Shqipëria po vijon të avancojë në zbatimin e reformave të lidhura me integrimin evropian, duke përfituar mbështetje financiare në kuadër të Planit të Rritjes (Growth Plan) të Bashkimit Evropian për Ballkanin Perëndimor.
Sipas Agjencisë për Media dhe Informim (MIA), duke iu referuar platformës “WEBALKANS_eu”, Shqipëria ka shënuar progres të qëndrueshëm në zbatimin e reformave, çka i ka mundësuar të përfitojë deri tani 23% të fondit të parashikuar nga ky instrument financiar.
MIA thekson se Plani i Rritjes synon të përshpejtojë zhvillimin ekonomik të vendeve të Ballkanit Perëndimor, të rrisë investimet dhe të afrojë ekonomitë e rajonit me tregun e përbashkët dhe standardet e Bashkimit Evropian.
Përmes kësaj mbështetjeje, Shqipëria do të përfitojë fonde dhe asistencë për forcimin e ekonomisë, rritjen e konkurrueshmërisë, përmirësimin e infrastrukturës dhe lidhjeve rajonale, mbështetjen e biznesit dhe sipërmarrjes, si dhe përshpejtimin e reformave të nevojshme në procesin e anëtarësimit në Bashkimin Evropian.
Plani i Rritjes për Ballkanin Perëndimor është një iniciativë strategjike e BE-së që synon të nxisë rritjen ekonomike, krijimin e vendeve të reja të punës dhe afrimin gradual të vendeve të rajonit me politikat dhe standardet evropiane përmes reformave dhe investimeve.
Sipas institucioneve përgjegjëse, zbatimi i këtij plani pritet të ndikojë pozitivisht në rritjen e potencialit ekonomik të Shqipërisë, përmirësimin e klimës së biznesit dhe përshpejtimin e procesit të integrimit evropian, duke krijuar më shumë mundësi zhvillimi për qytetarët dhe sipërmarrjen shqiptare.
