SHBA godet sërish Iranin, sulmet nisin pas hyrjes në fuqi të bllokadës detare
Shtetet e Bashkuara kanë ndërmarrë një valë të re sulmesh ndaj objektivave ushtarake në Iran, vetëm një orë pasi hyri në fuqi bllokada amerikane ndaj porteve dhe anijeve iraniane, duke rritur më tej tensionet mes Uashingtonit dhe Teheranit.
Sipas një zyrtari amerikan, të cituar nga Associated Press, operacionet ushtarake nisën menjëherë pas zbatimit të masave të reja detare, në kuadër të përshkallëzimit të konfliktit mes dy vendeve.
Ndërkohë, Komanda Qendrore e Shteteve të Bashkuara (CENTCOM) konfirmoi se bllokada ndaj porteve dhe anijeve iraniane ka hyrë zyrtarisht në fuqi.
Sipas njoftimit, rreth 20 anije luftarake dhe qindra avionë ushtarakë amerikanë janë dislokuar në Lindjen e Mesme dhe po marrin pjesë në operacionet ushtarake në rajon.
“Forcat amerikane mbeten vigjilente, vdekjeprurëse dhe të gatshme”, thuhet në deklaratën e CENTCOM.
Përshkallëzimi i fundit vjen në një moment tensionesh të larta në Lindjen e Mesme, ndërsa komuniteti ndërkombëtar po ndjek me shqetësim zhvillimet dhe rrezikun e zgjerimit të konfliktit në rajon.
