Drejtori ekzekutiv i OpenAI, Sam Altman, ka paralajmëruar kundër tendencës për t’u atribuar modeleve të inteligjencës artificiale autoritet fetar ose për t’ua deleguar atyre gjykimin njerëzor, duke e cilësuar këtë si një “çështje reale sigurie”.
“Jam shumë në siklet me njerëzit që përpiqen t’u atribuojnë forcë fetare modeleve të IA-së ose të dorëzojnë gjykimin njerëzor tek ato dhe mendoj se kjo është një çështje reale sigurie”, shkroi Altman në platformën X.
Komenti i tij vjen në mes të një debati në rritje mbi mënyrën se si kompanitë e teknologjisë duhet të trajtojnë pyetjet rreth ndërgjegjes, moralit dhe statusit të mundshëm etik të sistemeve të avancuara të IA-së.
Në qendër të debatit është edhe Anthropic, kompania që zhvillon modelin Claude. Sipas raportimeve të fundit, kompania ka zhvilluar takime me studiues fetarë dhe filozofë për të diskutuar ndër të tjera nëse sistemet e avancuara të IA-së mund të kenë ndonjë formë ndërgjegjeje dhe çfarë implikimesh morale do të kishte kjo.
Vetë Anthropic pranon se statusi moral i modeleve të IA-së është “thellësisht i pasigurt” dhe se nuk ka një përgjigje përfundimtare nëse Claude mund të konsiderohet një subjekt me interesa morale. Kompania thotë se po e studion çështjen me kujdes, pa pretenduar se modeli është i vetëdijshëm.
Debati ka përfshirë edhe drejtues të tjerë të industrisë. Kreu i Microsoft AI, Mustafa Suleyman, ka kundërshtuar idenë e trajtimit të sistemeve të inteligjencës artificiale sikur të kenë ndjenja apo përvoja subjektive, duke argumentuar se ato duhet të mbeten mjete të ndërtuara për t’u shërbyer njerëzve.
Përplasja reflekton një debat më të gjerë në industrinë e teknologjisë: jo vetëm se sa të fuqishme duhet të bëhen modelet e IA-së, por edhe si duhet të perceptohen nga njerëzit dhe deri ku duhet të shkojë besimi tek vendimet apo këshillat e tyre.
Në këtë kontekst, paralajmërimi i Altmanit vendos theksin te ruajtja e gjykimit dhe përgjegjësisë njerëzore, edhe në një kohë kur sistemet e inteligjencës artificiale po marrin role gjithnjë e më të avancuara në jetën e përditshme.
