Një student pjesëmarrës në protestat që po zhvillohen në Tiranë ka deklaruar se mban kontakte të vazhdueshme me studentë në Serbi, me të cilët shkëmben përvoja mbi organizimin dhe format e protestave.
I ftuar në emisionin “Breaking” në Euronews, studenti u pyet për ngjashmëritë mes protestave në Shqipëri dhe atyre në Serbi, si dhe për mundësinë e krijimit të një alternative politike nga lëvizja studentore.
Ai konfirmoi se ka ndjekur zhvillimet në Serbi dhe se komunikon rregullisht me studentë të atjeshëm për mënyrat e organizimit të demonstratave.
“Kam ndjekur dhe kam miq të mirë studentë në Serbi, me të cilët padyshim ngelemi në një kontakt të vazhdueshëm lidhur me organizimin e protestave dhe format që patjetër edhe ata kanë aplikuar”, u shpreh ai.
Deklarata vjen në një kohë kur në Shqipëri po diskutohet organizimi i protestave studentore dhe ngjashmëritë e tyre me lëvizjet e të rinjve në vende të tjera të rajonit.
Studenti: Nuk kemi menduar ende krijimin e një alternative politike
I pyetur nëse protestat në Tiranë mund të ndjekin modelin serb, ku lëvizja studentore ka kaluar edhe drejt organizimit elektoral, studenti tha se aktualisht nuk ka një plan konkret për krijimin e një force të re politike.
“Me thënë të drejtën, në Shqipëri nuk është menduar konkretisht krijimi i një alternative nga sheshi në këto momente. Bëhet fjalë për një alternativë, e cila do të vijë padyshim pas dorëheqjes së kryeministrit Edi Rama”, deklaroi ai.
Sipas studentit, kërkesa kryesore e protestuesve është largimi i kryeministrit nga detyra, pa pritur zhvillimin e zgjedhjeve të ardhshme.
“Fokusi kryesor në protestat e të rinjve dhe të rejave në Tiranë është dorëheqja e Edi Ramës. Ata nuk duan t’i japin më kohë Edi Ramës deri të vijnë votimet. Ata kërkojnë padyshim dorëheqje”, theksoi ai.
Deklaratat e studentit sjellin një tjetër element në diskutimin mbi format e organizimit të protestave në kryeqytet dhe ndikimin që përvojat e lëvizjeve studentore në rajon mund të kenë te pjesëmarrësit e tyre.
Megjithatë, kontaktet dhe shkëmbimi i përvojave me studentët serbë, të përmendura gjatë intervistës, nuk provojnë në vetvete se protestat në Tiranë drejtohen apo koordinohen nga organizata jashtë Shqipërisë.
