Polemika në Itali pas deklaratave të Rutte për bazat ushtarake gjatë konfliktit me Iranin
Deklaratat e Sekretarit të Përgjithshëm të NATO-s, Mark Rutte, mbi përdorimin e bazave ushtarake amerikane në Itali gjatë konfliktit me Iranin kanë shkaktuar debat politik dhe diplomatik në Romë.
Gjatë një interviste për Fox News, Rutte deklaroi se rreth 500 avionë amerikanë janë ngritur nga bazat ushtarake në Itali në mbështetje të operacionit “Epic Fury”, duke e cilësuar Evropën si një platformë të rëndësishme për operacionet amerikane.
Megjithatë, Ministria italiane e Mbrojtjes reagoi menjëherë, duke kundërshtuar deklaratat e kreut të NATO-s dhe duke i cilësuar ato si një “mesazh krejtësisht të gabuar”.
Sipas autoriteteve italiane, qeveria ka autorizuar vetëm fluturime me karakter teknik dhe logjistik në përputhje me marrëveshjet dypalëshe që rregullojnë përdorimin e bazave amerikane në territorin italian.
“Sa herë që është kërkuar autorizim jashtë këtij kuadri, Italia nuk e ka miratuar atë”, thuhet në reagimin zyrtar të Ministrisë së Mbrojtjes.
Debati vjen në një moment të ndjeshëm për marrëdhëniet transatlantike, ndërsa presidenti amerikan Donald Trump ka kritikuar publikisht disa aleatë evropianë, përfshirë Italinë, Britaninë e Madhe dhe Gjermaninë, për mungesë mbështetjeje ndaj SHBA-së gjatë konfliktit me Iranin.
Ndërkohë, Mark Rutte pritet të zhvillojë një takim me presidentin Trump në Shtëpinë e Bardhë, ku një nga temat kryesore do të jetë koordinimi mes NATO-s dhe administratës amerikane pas tensioneve të fundit.
Rutte ka sqaruar se shumica e fluturimeve ushtarake amerikane të kryera nga bazat në Evropë kanë qenë pjesë e aktiviteteve të zakonshme të aleancës dhe jo domosdoshmërisht operacione luftarake.
