Dy figurat më të njohura të BE kanë nënshkruar një traktat duke i hapur kështu rrugën Brexit javën e ardhshme.
Ursula Von Der Leyen, presidente e Komisionit Evropian dhe Charles Michel, kreu i Këshillit Evropian, ratifikuan sot “marrëveshjen e divorcit” nga ana e Brukselit.
Ratifikimi erdhi vetëm një ditë pasi marrëveshja Brexit u bë ligj në Mbretërinë e Bashkuar, fill pas miratimit në parlament të pasuar nga pëlqimi i mbretëreshës Elizabet.
Saktësisht në orën 7 të mëngjesit në Mbretërinë e Bashkuar, zonja Von Der Leyen njoftoi që sapo kishte nënshkruar marrëveshjen gjë që do të thotë se tani marrëveshja pritet të aprovohet nga Parlamenti Evropian.
Z. Michel, ish Kryeministër i Belgjikës, shkroi gjithashtu në tëitter: “Gjërat do të ndryshojnë në mënyrë të pashmangshme, por miqësia jonë do të vazhdojë. Ne do të fillojmë një kapitull të ri si partnerë dhe aleatë.”
Ai shtoi në frëngjisht: “Mezi pres ta shkruajmë së bashku këtë faqe të re.”
Eunews.al
