Ministri i Mbrojtjes Ermal Nufi pret homologun grek Nikos Dendias, fokus në sigurinë rajonale dhe integrimin europian
Ministri i Mbrojtjes, Ermal Nufi, priti sot në Tiranë ministrin e Mbrojtjes së Greqisë, Nikos Dendias, në një takim zyrtar ku në qendër të diskutimeve ishte forcimi i bashkëpunimit dypalësh në fushën e mbrojtjes dhe sigurisë.
Takimi u zhvillua në një klimë pozitive dhe bashkëpunuese, ku të dy palët vlerësuan marrëdhëniet e qëndrueshme mes Shqipërisë dhe Greqisë, si dhe shprehën vullnetin për thellimin e mëtejshëm të tyre në sektorë me rëndësi strategjike. Ministrat diskutuan për intensifikimin e dialogut institucional, shkëmbimin e eksperiencave dhe rritjen e bashkëpunimit operacional mes forcave të armatosura të dy vendeve.
Një nga temat kryesore të bisedimeve ishte edhe situata e sigurisë në rajon, ku u theksua rëndësia e koordinimit të ngushtë përballë sfidave të përbashkëta. Të dy ministrat nënvizuan se stabiliteti në Ballkanin Perëndimor mbetet një prioritet strategjik dhe kërkon angazhim të vazhdueshëm nga të gjitha vendet e rajonit dhe partnerët ndërkombëtarë.
Gjatë takimit, pala greke rikonfirmoi mbështetjen e saj për procesin e integrimit europian të Shqipërisë, duke e konsideruar atë si një element kyç për forcimin e sigurisë dhe zhvillimit në rajon. Ky qëndrim u vlerësua nga ministri shqiptar si një mbështetje e rëndësishme në rrugëtimin drejt Bashkimit Europian.
Në një reagim publik pas takimit, ministri Nufi theksoi rëndësinë e këtij bashkëpunimi dhe rolin e përbashkët të dy vendeve në ruajtjen e paqes dhe stabilitetit në rajon.
“Shqipëria vlerëson fort mbështetjen e vazhdueshme të Greqisë për rrugëtimin e saj evropian, ndërsa mbetemi të palëkundur në promovimin e stabilitetit dhe sigurisë rajonale, veçanërisht në Ballkanin Perëndimor – i cili mbetet prioritet strategjik i përbashkët i dy vendeve tona”, u shpreh ai.
Vizita e ministrit grek në Tiranë konsiderohet një hap i rëndësishëm në forcimin e marrëdhënieve dypalëshe në fushën e mbrojtjes, si dhe një sinjal i qartë i bashkëpunimit të qëndrueshëm mes dy vendeve anëtare të NATO-s në funksion të sigurisë kolektive dhe stabilitetit rajonal.
