Macron pranon gabimet: Kam bërë më të mirën për Francën

16 Nov 2026 • 23:36
Shpërndaje:

Presidenti francez Emmanuel Macron ka shënuar 10-vjetorin e shpalljes së kandidaturës së tij të parë presidenciale me një mesazh në platformën X, ku ka reflektuar mbi drejtimin e vendit dhe ka pranuar se gjatë viteve në pushtet ka bërë edhe gabime.

Mesazhi vjen rreth gjashtë muaj përpara përfundimit të mandatit të tij të dytë, në një periudhë të vështirë politike për presidentin francez, i cili po përballet me pakënaqësi sociale dhe rënie të mbështetjes publike.

“Dua t’u them atyre që nuk votuan për mua se në çdo moment bëra më të mirën time për të mirën e përgjithshme të vendit”, shkroi Macron.

Reklamë Ola

Presidenti pranoi se jo të gjitha vendimet e marra gjatë qeverisjes së tij kanë qenë të duhura.

“Ndonjëherë ka pasur gabime, por çdo ditë kemi punuar shumë, me shumë gra dhe burra të shquar, në shërbim të Francës dhe popullit francez”, u shpreh ai.

Reklamë InterMedika

Popullariteti i Macron në nivele të ulëta

Deklaratat vijnë në një kohë kur Franca është përballur me protesta studentore, tensione sociale dhe rritje të çmimeve të karburantit.

Sipas të dhënave të raportuara për muajin shtator, mbështetja për presidentin kishte rënë në 15%, niveli më i ulët që prej ardhjes së tij në pushtet në vitin 2017.

Në mesazhin e tij, Macron theksoi se gjatë dekadës së fundit është përpjekur të përmbushë premtimet dhe të përballojë krizat së bashku me qytetarët francezë.

Franca përgatitet për zgjedhjet presidenciale

Macron shpalli kandidaturën e tij të parë presidenciale në nëntor 2016, pak muaj pasi ishte larguar nga qeveria e presidentit socialist François Hollande, ku kishte mbajtur postin e ministrit të Ekonomisë.

Në atë kohë, ai e paraqiti projektin e tij politik si një alternativë që synonte të kapërcente ndarjen tradicionale mes së majtës dhe së djathtës.

Presidenti 48-vjeçar, i cili fitoi zgjedhjet presidenciale në vitet 2017 dhe 2022, nuk mund të kandidojë për një mandat të tretë radhazi.

Mandati i tij aktual përfundon më 13 maj 2027.

Ndërkohë, Franca po përgatitet për zgjedhjet e ardhshme presidenciale, ku Marine Le Pen, rivalja e mundur nga Macron në dy garat e mëparshme, mbetet një nga figurat kryesore të së djathtës radikale franceze.