Itali, ulet numri i pacientëve në gjendje kritike
Numri i pacientëve në kujdes intensiv në Itali ka rënë për herë të parë, thotë kreu i departamentit të mbrojtjes civile të vendit, Angelo Borrelli, raporton BBC.
Italia konfirmoi 681 vdekje të tjera të shtunën, duke e çuar numrin e përgjithshëm të vdekjeve në 15,362.
Por, Borrelli tha se numri i pacientëve me gjendje kritike ka rënë nga 4,068 sa ishte të premten në 3,994, të shtunën.
“Kjo është një pikë shumë e rëndësishme për shkak se shifra është duke u zvogëluar për herë të parë”, tha Borrelli.
“Është e rëndësishme sepse kjo lejon që spitalet tona të marrin frymë. Kjo është hera e parë që kjo shifër ka rënë që nga fillimi i menaxhimit të urgjencës”, tha ai.
Numri i rasteve të regjistruara si të infektuar më 4 prill ka qenë 2,886.
Banorëve në rajonin verior të Lombardisë tani do t’u kërkohet të mbajnë maska mbrojtëse ose të mbulojnë fytyrat kur të dalin jashtë.
Masa e re hyn në fuqi të dielën dhe do të zgjasë deri më 13 Prill.
E gjithë Italia është në izolim, por Lombardia – epiqendra e virusit në Evropë – ka pasur kufizime më të ashpra në lëvizje dhe biznes.
Eunews.al
