Greqia dhe Shqipëria drejt rifillimit të negociatave për kufirin detar
Greqia po intensifikon përpjekjet për të ringjallur negociatat me Shqipërinë lidhur me përcaktimin e zonave detare, në një përpjekje për të zgjidhur një çështje të mbetur pezull prej vitesh.
Sipas raportimit të medias greke “Tovima”, Ministri i Mbrojtjes i Greqisë, Nikos Dendias, pritet të vizitojë Tiranën javën e ardhshme për bisedime të nivelit të lartë. Vizita synon rifillimin e një procesi të rëndësishëm dypalësh që lidhet me kufijtë detarë mes dy vendeve.
Gjatë qëndrimit në Shqipëri, Dendias do të zhvillojë takime me Ministrin e Mbrojtjes, Ermal Nufi, si dhe me Kryeministrin Edi Rama. Këto takime pritet të fokusohen në hapat konkretë për të çuar përpara procesin e negociatave.
Objektivi kryesor i kësaj vizite është rikthimi në tryezë i një iniciative të përbashkët të dakordësuar në tetor të vitit 2020, kur Shqipëria dhe Greqia shpallën synimin për t’ia referuar çështjen e kufirit detar Gjykata Ndërkombëtare e Drejtësisë në Hagë.
Sipas burimeve, të dy vendet po përpiqen të shfrytëzojnë një moment pozitiv në marrëdhëniet dypalëshe. Kjo klimë më e favorshme vjen pas kontakteve të fundit diplomatike dhe në kuadër të mbështetjes që Greqia ka shprehur për integrimin europian të vendeve të Ballkanit Perëndimor, përfshirë Shqipërinë.
Në qendër të diskutimeve pritet të jetë hartimi i një marrëveshjeje formale, e cila do t’u mundësonte të dy vendeve t’ia paraqesin mosmarrëveshjen për shelfin kontinental dhe Zonën Ekonomike Ekskluzive (EEZ) gjykimit ndërkombëtar.
Kjo qasje synon të sigurojë një zgjidhje përfundimtare dhe të pranueshme për të dy palët, duke u bazuar në të drejtën ndërkombëtare dhe praktikat e njohura ndërkombëtarisht për delimitimin e kufijve detarë.
Nëse procesi avancon, ai do të përbënte një hap të rëndësishëm për stabilitetin në rajon dhe për forcimin e marrëdhënieve mes Shqipërisë dhe Greqisë, si dhe për rrugën e integrimit europian të Shqipërisë.
