Më shumë se 413 mijë punonjës të sektorit industrial në Gjermani kanë marrë pjesë gjatë kësaj jave në greva dhe protesta, duke kërkuar rritje pagash dhe garanci për ruajtjen e vendeve të punës.
Sipas sindikatës IG Metall, një prej organizatave më të mëdha sindikale në vend, që prej së dielës janë zhvilluar mbi 2 800 aksione proteste në të gjithë Gjermaninë.
Grevat kanë përfshirë industrinë automobilistike, kompanitë inxhinierike, prodhuesit e metaleve dhe furnitorët industrialë, pas dështimit të tri raundeve të negociatave mes sindikatës dhe punëdhënësve.
IG Metall kërkon një rritje pagash prej 5% për një periudhë 12-mujore, që do të përfshinte rreth 3.7 milionë punonjës. Sindikata kërkon gjithashtu paga më të larta për praktikantët, garanci për vendet e punës dhe shpërndarje të një pjese të fitimeve te punonjësit e kompanive fitimprurëse.
Nga ana tjetër, punëdhënësit kanë propozuar një pagesë të njëhershme gjatë vitit 2027 dhe një rritje pagash prej 1.3%, e cila do të hynte në fuqi në korrik 2028.
Kjo ofertë është refuzuar nga sindikata, e cila argumenton se, duke marrë parasysh inflacionin, propozimi do të sillte ulje të fuqisë blerëse të punonjësve.
Greva edhe në Bosch, Siemens dhe MAN
Të premten, protesta të reja përfshinë më shumë se 30 kompani në Nuremberg dhe zonat përreth, mes tyre Bosch, Siemens, MAN Truck & Bus dhe Schaeffler.
Në një prej fabrikave të Bosch, punonjësit bllokuan hyrjet e objektit dhe protestuan me pankarta ku shkruhej “Bjeri borisë për të ardhmen” dhe “Bjeri borisë për 5 për qind”.
Protestat në këtë fabrikë zhvillohen në një kohë kur kompania planifikon të shkurtojë mbi 900 vende pune deri në vitin 2029, duke shtuar pasigurinë mes punonjësve.
Vala e grevave vjen në një periudhë të vështirë për industrinë gjermane, e cila po përballet me presione ekonomike dhe plane për reduktimin e fuqisë punëtore.
Deri tani, negociatat mes IG Metall dhe përfaqësuesve të punëdhënësve nuk kanë prodhuar një marrëveshje për pagat dhe kushtet e punës.
